Ілан Маск патлумачыў, чаго не стае для каланізацыі Месяца

Кіраўнік SpaceX назваў каланізацыю Месяца «вялікім выклікам».

На мінулым тыдні кіраўнік кампаніі SpaceX Ілан Маск прадставіў доўгачаканы касмічны карабель Starship, які з'яўляецца самым магутным і вялікім на сёння. Паведамляецца, што Starship зможа перавозіць да 100 людзей за раз і стане асноўным транспартам падчас каланізацыі Марса і Месяца. Але вось наконт апошняга Маск нядаўна засумняваўся, паведамляе nv.ua.

Каліфарнійскі прадпрымальнік заявіў, што каланізацыя Месяца будзе вялікім выклікам для людзей, бо там недастаткова рэсурсаў, між іншым - вугляроду.

«Вялікай праблемай для дазапраўкі Starship на Месяцы з'яўляецца пошук крыніц вугляроду. Імаверна, вялікія яго паклады ёсць у кратарах ад метэарытаў. Тое ж самае тычыцца вадароду і кіслароду», - напісаў Ілан Маск у сваім Twitter.

Справа ў тым, што гэтыя рэсурсы на Марсе можна чэрпаць з разрэджанай атмасферы Чырвонай планеты, а на Месяцы атмасферы практычна няма. Пакуль, адзіная крыніца неабходных рэсурсаў для каланізацыі зямнога спадарожніка - гэта паклады лёду, якія нядаўна знайшлі ў кратарах на канцавосях Месяца, і з якіх можна здабыць ваду і вадарод для стварэння ракетнага паліва і падтрымання жыцця людзей.

Але, у планах Маска каланізацыя прадугледжвае стварэнне на Месяцы і Марсе складаў па вытворчасці паліва з вадароду і вугляроду. Апошняга якраз няма на зямным спадарожніку, і людзі пакуль не ведаюць як яго там вырабляць у велізарных маштабах.

Экспэрты тлумачаць, што здабываць вуглярод з глебы Месяца можа быць вельмі няпростай задачай, на якія пойдуць гады. Нават на Зямлі станаўленне такой здабычы можа заняць пару дзясяткаў гадоў.