У Менску могуць з'явіцца яшчэ 22 гандлёвыя цэнтры

Цяпер у Беларусі працуюць больш за 610 гандлёвых цэнтраў, некаторыя амаль пустыя.

У Менску ў агляднай будучыні могуць з'явіцца яшчэ 22 гандлёвыя цэнтры. Акрамя таго, ёсць яшчэ 104 намеры на будаўніцтва такіх аб'ектаў. Пра гэта распавёў Уладзімір Карагін, старшыня прэзідыума вышэйшай каардынацыйнай рады саюза юрыдычных асоб «Рэспубліканская канфедэрацыя прадпрымальніцтва», паведамляе tut.by.

У прадпрымальніцкіх колах яшчэ 10 гадоў таму прапаноўвалася прыняць закон пра гіпермаркеты, які б ўрэгуляваў пытанні будаўніцтва такіх аб'ектаў.

- Мы звярталі ўвагу на тое, што павінна быць аптымальная колькасць буйных аб'ектаў гандлю - гіпермаркетаў. Буйны гандаль не павінны быць у цэнтры горада, - тлумачыць Уладзімір Карагін. - Але яго, на жаль, не прынялі.

Менавіта праз тое, што такога закону няма, мы маем тое, што маем, мяркуе старшыня.

- Усе гандлёвыя цэнтры, у першую чаргу «Сталіца», на дзве траціны не запоўненыя. Прастойваюць плошчы. Колькасць гандлёвых цэнтраў у нас у 3 разы перавышае еўрапейскія нормы. А яшчэ пабудуецца 22. Я ведаю пра інвестыцыйныя праекты. А яшчэ ёсць 104 намеры будаўніцтва гандлёва-забаўляльнага цэнтра ў Менску. Ёсць паняцце «самаакупнасць аб'екта». У нас за 5 гадоў не акупляецца гандлёвы цэнтр, і нават за 11.

Нагадаем, у Беларусі на 1000 чалавек у сярэднім прыпадае 772,6 квадратнага метра гандлёвых плошчаў. Пры гэтым паводле нарматываў досыць і 600. Некаторыя гандлёвыя аб'екты стаяць паўпустыя. Тым не менш летам МАРГ казаў, што ў адным толькі Менску хутка адкрыецца яшчэ з паўдзясятка новых гандлёвых цэнтраў. Усяго цяпер па краіне працуюць больш 610 ГЦ.