Трамп і Эрдаган абмеркавалі супольную вытворчасць знішчальнікаў F-35

Прэзідэнты ЗША і Турцыі сустрэліся ў Вашынгтоне.

ЗША і Турцыя абмеркавалі з прадстаўнікамі Сената магчымыя варыянты прадаўжэння супольнай праграмы вытворчасці амерыканскіх знішчальнікаў F-35. Пра гэта прэзідэнт ЗША Дональд Трамп апавёў у сераду на прэс-канферэнцыі паводле вынікаў перамоваў з прэзідэнтам Турцыі Рэджэпам Эрдаганам, паведамляе Радыё Свабода.

Адказваючы на пытанне журналіста пра далейшы лёс супольнай праграмы ў вытворчасці знішчальнікаў F-35, Трамп адзначыў, што для прадаўжэння супрацоўніцтва ёсць мноства альтэрнатываў. "Паводле маіх прагнозаў, мы што-небудзь прыдумаем", – падкрэсліў Трамп.

Кіраўнік Белага дому таксама апавёў, што на перамовах падымалася тэма набыцця Турцыяй расейскіх зенітна-ракетных комплексаў С-400. Паводле словаў Трампа, бакі гатовыя да абмеркавання гэтага пытання.

Прэзідэнт ЗША таксама паведаміў, што краіны плануюць пашырыць гандлёвае супрацоўніцтва. Перад перамовамі Трамп нагадаў, што на сёння гандаль паміж краінамі складае 20 мільярдаў даляраў. Мяркуецца, што аб'ём можа быць пашыраны да 100 мільярдаў даляраў.

Перамовы праходзяць на фоне сур'ёзнага ўскладнення стасункаў паміж дзвюма краінамі пасля пачатку турэцкай ваеннай аперацыі на поўначы Сірыі. Вашынгтон выключыў Анкару з праграмы вытворчасці F-35 пасля таго, як Турцыя набыла расейскія зенітна-ракетныя комплексы С-400.