Крэйг Вудкрафт распавёў аб матывацыйных «фішках» у менскім «Дынама»

Настаўнік «зуброў» заявіў, што падгледзеў іх у іншага трэнера.

Галоўны трэнер менскага «Дынама» Крэйг Вудкрафт распавёў, як матываваў каманду, піша «Трибуна».

- Улічваючы тое, што каманда праводзіць другі матч за два дні, вы сёння па-асабліваму матывавалі каманду?

- Мы перад гэтым матчам пагаварылі з камандай. Сказалі, што плэй-оф ужо пачаўся, мы не маем права больш саступаць. Мы павінны выходзіць з павышаным жаданнем перамагаць, кідаць у браму.

Што тычыцца фішак матывацыі, то сёння перад трэцім перыядам мы прапанавалі разыграць «карту капітана» на выкананне жаданняў ад калектыву. Гэтая «карта» даецца капітану, які можа скарыстацца ёй у кожны дзень. Яна значыць выходны ў кожны дзень. Калі каманда хоча ўзяць выходны, то капітан абавязаны падысці да трэнерскага штаба. Мы сказалі хлопцам, што калі яны выканаюць устаноўку на трэці перыяд, то яны атрымаюць такую магчымасць. Я падгледзеў гэтую ідэю ў аднаго вядомага трэнера і бачыў, як яна дзейнічае на гульцоў, што яна дае максімальную матывацыю. І вы сёння бачылі, як гэта спрацавала. Толькі нікому не кажыце, гэта будзе наш маленькі сакрэт, - сказаў Вудкрафт.