Як беларусы праганяюць фальсіфікатараў са сваіх дамоў

Чальцы камісій нахабна абыходзяць кватэры беларусаў без іх запрашэння.

Belsat.eu стала вядома як мінімум пра два выпадкі, калі да людзей прыходзілі ў кватэры са скрынямі для галасавання - хоць ніякіх заявак у выбарчых камісіях ніхто загадзя не пакідаў.

Чальцы камісіі на 59-м участку ў Магілёве абыходзяць кватэры, у якіх прапісаны пенсіянеры. «Але мы не выклікалі камісію ў дом і не паведамлялі, што хочам прагаласаваць дома», - паведаміў Зміцер Салаўёў, сын пенсіянеркі.

«Наш дом на праспекце Міра, 25 у Магілёве. Сёння чальцы камісіі хадзілі па ўсіх кватэрах, дзе могуць пражываць пенсіянеры. На маё пытанне, чаму яны прыйшлі, яны адказалі, што атрымалі спіс адрасоў ад старшыні камісіі. Мы не падавалі адпаведнай заяўкі і ўжо рыхтуем скаргу ў акруговую выбарчую камісію".

Аналагічны выпадак адбыўся і ў сяле ў Валожынскім раёне Менскай вобласці.

- Прыйшлі раніцай, прыкладна аб 11:00, двое мужчын з бэйджамі і з скрынкай. Хоць я нікога не выклікаў. Кажуць: «Галасаванне». Я спытаў: «Навошта?» Мужчыны здзівіліся, што я не буду галасаваць і сышлі, - распавёў мясцовы жыхар Павел. Яго вельмі абурыла такая сітуацыя: - Як дарогу зімой пачысціць - то не могуць даехаць, а як скрыню прывезці - дык на табе.

Нацыянальны каардынатар кампаніі назірання «Права выбару» Аляксандар Сілкоў у каментары адзначыў, што абыход кватэр без адпаведнай заяўкі - гэта відавочнае парушэнне.

«Сёння з 8:00, калі толькі адкрыліся ўчасткі, яны заяўляюць, што ў нас нібыта запісаліся 200 чалавек і пачынаюць абыходзіць людзей, хоць людзі іх не выклікалі», - канстатуе прадстаўнік «Права выбару».

Такія парушэнні фіксуюцца ў розных гарадах Беларусі. Сілкоў мяркуе, што з гэтай нагоды трэба звяртацца ў пракуратуру.

«Бо гэта сапраўдны падробка дакументаў: людзі не запрашалі, а да іх прыходзяць са скрынямі. Я ўпэўнены, што ўлада паставіла задачу: 70% за праўладнага кандыдата - і выконвайце загад як хочаце», - адзначыў ён.