Упаўнаважаны Зяленскага: Расейцы не змогуць купляць украінскую зямлю

Калі гэта здарыцца, будзе выкарыстоўвацца механізм спецыяльнай канфіскацыі на карысць дзяржавы.

Расейцы не змогуць купляць ўкраінскія землі сельскагаспадарчага прызначэння, заявіў у інтэрв'ю Інтэрфакс-Украіна, фрагмент якога апублікаваны 19 лістапада, упаўнаважаны прэзідэнта Украіны Уладзіміра Зяленскага ў зямельных пытаннях Раман Лешчанка.

Ён растлумачыў, што калі сярод заснавальнікаў украінскіх кампаній, якія купляюць зямлю сельскагаспадарчага прызначэння, апынуцца грамадзяне Расеі, то будзе выкарыстоўвацца механізм спецыяльнай канфіскацыі ўласнасці на карысць дзяржавы, прапісаны ў законапраекце аб рынку зямлі.

"У законе будзе дакладна прапісана, у пераходных палажэннях, што пытанне аб допуску замежнікаў [да куплі зямлі сельгаспрызначэння] толькі праз ўсеўкраінскі рэферэндум. Да гэтага моманту - ніякіх замежнікаў. Расейцы ў прынцыпе не абмяркоўваюцца. Гэта краіна-агрэсар, яны ні пры якіх абставінах не будуць купляць зямлю. Калі праз нейкія механізмы дзесьці з'яўляюцца расейцы, мы ажыццяўляем спецканфіскацыю ў даход дзяржавы. У законе гэтая санкцыйная норма будзе дакладна прапісаная", - заявіў Лешчанка.

Упаўнаважаны Зяленскага адзначыў, што заснавальнікамі юрыдычных асоб, якія будуць мець права купляць зямлю, могуць быць толькі грамадзяне Украіны - без падвойнага грамадзянства, якія пражываюць на тэрыторыі краіны.

"У нас будуць прамыя карпаратыўныя дачыненні. То бок, не афшор на Кіпры, потым яшчэ адзін афшор, а потым нейкая асоба будзе заснавальнікам. Мы гэта робім для таго, каб была празрыстая структура ўласнасці юрыдычных асоб", - працягнуў Лешчанка.

З 2002 года ва Украіне дзейнічае мараторый на продаж зямель сельскагаспадарчага прызначэння. 20 снежня 2018 Вярхоўная Рада падоўжыла яго да 2020 года.

У верасні 2019 года прэзідэнт Украіны Уладзімір Зяленскі даручыў Кабінету Міністраў распрацаваць законапраект аб увядзенні ў краіне рынку зямлі сельскагаспадарчага прызначэння. Урад падаў у Раду праект закона №2178 25 верасня, але ў першым чытанні парламент прыняў альтэрнатыўны законапраект №2178-10 аўтарства дэпутатаў ад "Слугі народа".

Прэм'ер-міністр Украіны Аляксей Ганчарук анансаваў адкрыццё рынку зямлі ва Украіне з 1 кастрычніка 2020 года.

Са слоў Зяленскага, палітыкі апошнія 20 гадоў маніпулююць пытаннем рынку зямлі. Ён паабяцаў, што паміж першым і другім чытаннямі адпаведнага законапраекта пытанне аб магчымасці продажу зямлі замежнікам вынесуць на ўсеўкраінскі рэферэндум.

Вярхоўная Рада Украіны 13 лістапада 240 галасамі прыняла ў першым чытанні законапраект №2178-10 "Аб унясенні змяненняў у некаторыя заканадаўчыя акты Украіны з нагоды абарачэння зямель сельскагаспадарчага прызначэння". Законапраект не падтрымалі парламенцкія фракцыі "Бацькаўшчына", "Апазіцыйная платформа - За жыццё", "Еўрапейская салідарнасць", "Голас", а таксама дэпутацкая група "За майбутнє".