Салдаты ганаровай варты Літвы і Польшчы правялі рэпетыцыю развітання з Каліноўскім
22.11.2019, 9:14
8,449
Трэніроўка прайшла на Старых Росах у Вільні.
«Белсат» наведаў могілкі Старыя Росы ў Вільні, дзе праходзіць рэпетыцыя ўрачыстасці перапахавання дваццаці ўдзельнікаў паўстання 1863–1864 гадоў.
Ганаровыя варты Літвы і Польшчы правялі генеральную рэпетыцыю ўрачыстай цырымоніі перапахавання, якая пачнецца літаральна праз гадзіну, паведамляе «Белсат».
Польскія харцары запалілі свечкі над магіламі тых паўстанцаў, якія пазбеглі павешання на Лукішках і здолелі вярнуцца з Сібіры.
«Грамадскі камітэт апекі над Старымі Росамі і Арганізацыя польскіх харцараў у Літве пастанавілі ўшанаваць памяць паўстанцаў 1863–1864 гадоў 21 лістапада, бо заўтра, 22 лістапада, у сувязі з захадамі бяспекі мы не маглі б гэтага зрабіць», – апавяла «Белсату» Аліна Абалевіч з Польскага дыскусійнага клуба.