Як Пуцін «атрымаў гарбуза» ад беларусаў
10- 6.12.2019, 13:56
- 26,444
Расеі нагадалі пра артыкул №1 нашай Канстытуцыі.
«Баяцца не трэба – трэба прымаць мужныя пастановы», – так выказаўся ўчора прэм'ер Расеі пра будучыню інтэграцыйнай дамовы. У гэты самы час Лукашэнка, які таксама ўчора шмат казаў, запэўніў, што спрэчных пытанняў паміж Масквой і Менскам усё менш, паведамляе «Белсат».
Беларускія дзяўчаты з кампаніі «Свежы вецер» прыкацілі гарбуз да брамы амбасады Расеі, з якой Беларусь уцягваецца ў цесны звяз.
«Калі жаніх сватаецца, але дзяўчына не згодная, то дзяўчаты выкатваюць гарбуз. Гэта значыць, мы паказваем, што згодныя сябраваць з усімі, але не хочам жыць у чужым доме», – кажа Сяргей Бульба з грамадзянскай кампаніі «Свежы вецер».
Актывісты кампаніі ў абарону нашай незалежнасці хацелі перадаць зварот амбасадару. У дакуменце напісана, што значная частка палажэнняў «саюзнай дамовы» супярэчаць артыкулу №1 Канстытуцыі, згодна з якой Беларусь унітарная дзяржава з уласнай унутранай і знешняй палітыкай. Дзмітрый Мядзведзеў учора «супакойваў», што і Расея свой суверэнітэт часткова паменшыла, уваходзячы ў Еўразійскі звяз.