Нарвежская выведка падрыхтавалася да ўзмацнення хакерскіх нападаў з Расеі

У 2019 годзе кібершпіянаж стане менш маштабным.

Расея і Кітай будуць узмацняць выведвальны ціск на Нарвегію ў інтэрнэце, абедзве краіны здольныя праводзіць складаныя наступальныя аперацыі ў інтэрнэце і ўвесь час паляпшаюць свае навыкі. Пра гэта, як піша газета Verdens Gang, гаворыцца ў штогадовым дакладзе нарвежскай выведкі Focus 2019, паведамляе РБК.

Расея будзе прадаўжаць дзейнасць у сеціве, накіраваную на падрыў палітычных працэсаў і ўзмацненне супярэчнасцяў у Еўропе і NATO, заявіў у дакладзе начальнік электроннай выведкі генерал-лейтэнант Мортэн Хага Лундзе.

«Яны не змяняюць свае паводзіны нават пасля таго, як часам бываюць раскрытыя», - сказаў ён.

Адным з дзейсных спосабаў уплыву, папярэдзіў Лундзе, з'яўляецца стварэнне сайтаў з хлуслівымі навінамі. «Расце колькасць сайтаў навін са скажонай інфармацыяй, каб выставіць заходнюю супольнасць і заходнія каштоўнасці ў дрэнным святле. І Нарвегія не з'яўляецца выключэннем», - заявіў ён.

Асаблівую цікавасць для выведак уяўляе нарвежская палітыка ў галіне абароны і бяспекі, вайсковыя планы на выпадак надзвычайных сітуацый, удакладніў Лундзе.

Раней 7 лютага Швэдскі інстытут абаронных даследаванняў (FOI) прадставіў даклад, складзены на замову Мінабароны краіны. Даследаванне праводзілася на аснове звестак з адкрытых крыніц расейскага Мінабароны, спецыялісты са Швэцыі вывучалі расейскія стратэгічныя вайсковыя вучэнні за апошнія некалькі гадоў.

Яны прыйшлі да высновы, што расейскія вайскоўцы ўсё больш актыўна адпрацоўваюць вядзенне поўнамаштабнай вайны, а пачынаючы з 2013 года Расея на самым высокім дзяржаўным узроўні пры ўдзеле Уладзіміра Пуціна кантралюе боегатоўнасць войскаў і іх здольнасць да хуткай мабілізацыі.

У штогадовай справаздачы Службы бяспекі інфармацыі Чэхіі (Bezpečnostní informační služba, BIS), прадстаўленай у снежні 2018 года, гаварылася аб дачыненні да кібератак на дзяржаўныя ўстановы краіны расейскіх хакераў.

«Згодна з нашымі высновамі, арганізаваная Turla (адна з расейскамоўных хакерскіх груповак. - РБК) кампанія кібератак зыходзіць ад расейскай выведвальнай службы ФСБ і [групоўкі] APT28/Sofacy (больш вядомая пад назвай Fancy Bear. - РБК), якой прыпісваецца сувязь з вайсковай выведкай ГРУ», - гаварылася ў справаздачы.

У дакуменце гаворыцца, што ў 2016-2017 гадах хакеры здолелі ўзламаць інфармацыйную сістэму Міністэрства замежных спраў Чэхіі, дзякуючы чаму яны атрымалі доступ да скрыняў электроннай пошты паўтары сотні супрацоўнікаў установы і скапіявалі інфармацыю. Спецыялісты BIS адзначылі, што галоўнай мэтай хакераў сталі паштовыя скрыні вышэйшых чыноў МЗС, зламыснікі правяралі іх неаднаразова і здолелі атрымаць нямала інфармацыі, карыснай для правядзення новых нападаў на іншыя дзяржустановы.