У Беларусі з'явіўся новы тып махлярства з карткамі і банкаўскімі рахункамі

Што такое вішынг.

У Беларусі з'явіўся новы тып махлярства з банкаўскімі карткамі - так званы вішынг, паведамляюць некаторыя банкі. Некаторыя з пацярпелых ужо напісалі заявы ў міліцыю, у аднаго з іх ашуканцы спісалі з рахунку 2,5 тысячы рублёў, піша tut.by.

«Зламыснікі ажыццяўляюць званкі кліентам банкаў і, прадстаўляючыся работнікамі службаў бяспекі банкаў Беларусі, на розныя прычыны просяць даць канфідэнцыйную інфармацыю: пашпартныя звесткі, - распавядаюць у Банку БелЗЭБ. - Зламыснікі таксама просяць даць рэквізіты банкаўскіх аплатных картак і коды, якія паступаюць на тэлефонны нумар кліента».

У некаторых выпадках тыя, хто тэлефануе прадстаўляюцца супрацоўнікамі падраздзялення IT-банка і ўдакладняюць, у якім з пералічаных банкаў кліент абслугоўваецца. Пасля гэтага кліенту паступае званок ад імя службы бяспекі банка з нумара тэлефона таго банка, які кліент паказаў сам.

У асобных выпадках нумары ўваходных тэлефонных званкоў схаваныя альбо належаць расейскім мабільным аператарам. «Устаноўленыя факты выкарыстання праграм-ананімайзераў, калі ўваходныя званкі вызначаюцца як афіцыйныя нумары тэлефонаў, названыя на сайце банка», - адзначаюць у Банку БелЗЭБ.

У сталічную міліцыю ўжо звярнуліся мужчына і жанчына, якім патэлефанавалі нібыта прадстаўнікі аднаго з беларускіх банкаў і прасілі паведаміць пашпартныя звесткі і рэквізіты банкаўскіх картак. Мужчына адмовіўся паведамляць і сам звярнуўся ў банк. Выявілася, што з банка яму не тэлефанавалі. А вось жанчына паверыла на слова і ў выніку з карт-рахунку незаконна спісалі 2,5 тысячы рублёў, паведамляюць у МУС.

Як не трапіць на падман?

Супрацоўнік банка пры тэлефанаванні кліенту загадзя павінен ведаць усе неабходныя яму звесткі. «Таму паведамляць камусьці рэквізіты банкаўскай аплатнай карткі, паролі і коды доступу, пашпартныя звесткі ні ў якім разе нельга, - распавядаюць у Банку БелЗЭБ. - Пры атрыманні падазронага званка неабходна праявіць пільнасць і не паддавацца на прапановы паведаміць інфармацыю пра рэквізіты карткі. Пасля размовы, пры падазрэнні аб факце махлярства, сваю картку можна заблакаваць пры дапамозе сістэмы дыстанцыйнага банкаўскага абслугоўвання або кантакт-цэнтра банка».

Калі званок ці СМС паступяць нібыта з афіцыйнага нумару банка і вас будуць прасіць паведаміць звесткі карткі, то трэба паведаміць аўтару тэлефоннага званка, што няхай ён сам патэлефануе ў кантакт-цэнтр або мэнэджару банка.