У Сеціве выявілі кітайскую базу звестак сачэння за мільёнамі чалавек

У яе траплялі GPS-каардынаты і вынікі распазнання твараў.

Экспэрт па кібербяспецы Віктар Геверс з некамерцыйнай арганізацыі GDI Foundation выявіў у вольным доступе базу звестак, у якой кітайскія ўлады збіралі персанальныя звесткі амаль 2,6 млн жыхароў Сіньцзян-Уйгурскага аўтаномнага раёна, паведамляе Financial Times (пераклад - РБК).

У базу ў рэжыме рэальнага часу траплялі фатаграфіі і звесткі аб месцазнаходжанні, імёны, ідэнтыфікацыйныя нумары, хатнія адрасы, працадаўцы. Геверс мяркуе, што ў якасці крыніцы звестак шырока выкарыстоўваліся камеры назірання ў комплексе з сістэмай распазнання твараў. З ягоных слоў, толькі за адзін дзень было сабрана амаль 6,7 млн GPS-каардынат. Многія з тых, чые звесткі трапілі ў базу, з'яўляюцца ўйгурамі.

Вяла базу звестак кітайская кампанія SenseNets. На працягу паўгода база была ў вольным доступе, аднак пасля запыту ў SenseNets гэтая ўразлівасць была ліквідаваная. «Гэтая база звестак выкарыстоўваецца афіляванымі з урадам структурамі для адсочвання меншасцяў», - распавёў выданню Боб Дз’ячэнка з Security Discovery, кансалтынгавай кампаніі, якая раней працавала з Геверсам. SenseNets на сваім вэб-сайце распавяла, як дапамагла паліцыі ў паўднёвай правінцыі Гуандун вылучыць абвінавачванні супраць людзей, якія ўдзельнічаюць у незаконных сходах (эўфемізм для абазначэння палітычных пратэстаў), адзначае газета.

Акрамя сістэм татальнага сачэння ў Сіньцзян-Уйгурскім аўтаномным раёне кітайскія ўлады арганізавалі там вялікую колькасць лагераў. Пра гэта ў жніўні 2018 года падчас пасяджэння Упраўлення Вярхоўнага камісара ААН правоў чалавека заявіў сябра Камітэта ААН ліквідацыі расавай дыскрымінацыі Гэй Макдугал. З яго слоў, больш за 1 млн этнічных уйгураў у Кітаі ўтрымліваюцца ў месцах, якія нагадваюць «велізарны лагер для інтэрнаваных, інфармацыя пра які трымаецца ў сакрэтнасці».

Па сцвярджэнні Макдугал, яшчэ 2 млн уйгураў і іншых прадстаўнікоў мусульманскіх меншасцяў адпраўляюцца ў «палітычныя лагеры для ідэалагічнай апрацоўкі». Прысутная на пасяджэнні кітайская дэлегацыя прыкладна з 50 чыноўнікаў ніяк не пракаментавала гэтую інфармацыю.

У лютым 2019 года тэлекампанія CNN паведаміла, што тысячы мусульман-уйгураў утрымліваюцца ў так званых палітычных адукацыйных лагерах у рэгіёне Сіньцзян. Спасылаючыся на Radio Free Asia, тэлеканал адзначаў, што, паводле апошніх звестак, у лагеры былі адпраўленыя не менш за 120 тысяч уйгураў. Уйгуры - цюркскі народ, які насяляе Сіньцзян-Уйгурскі аўтаномны рэгіён КНР, у асноўным вызнаюць іслам. Як адзначае CNN, кітайскія ўлады праводзяць у рэгіёне кампаніі супраць «тэрарызму, сепаратызму і рэлігійнага экстрэмізму».