Клімкін заклікаў Захад узаемадзейнічаць з РФ з пазіцыі сілы, «а не з пазіцыі прымірэння»
1- 20.02.2019, 20:30
- 13,280
Міністр замежных справаў Украіны напісаў калонку для Washington Post.
Кіраўнік Міністэрства замежных справаў Украіны Павел Клімкін заклікаў сусветную супольнасць узмацніць ціск на РФ. Пра гэта ён напісаў у калонцы для выдання Washington Post (пераклад – gordonua.com) з нагоды пяцігоддзя з дня анэксіі Крыма Расеяй.
У артыкуле пад назвай "Прайшло пяць гадоў, а Расея дагэтуль акупуе тэрыторыю Украіны" Клімкін нагадаў, што ўпершыню з 1940-х гадоў еўрапейская дзяржава адважылася сілай захапіць тэрыторыю суседа.
Цяпер Крым ператварыўся ў "праваабарончую чорную дзірку", дзе жорстка пераследуюць карэннае крымска-татарскае насельніцтва, чаму спрыяе адсутнасць міжнароднай увагі, адзначыў Клімкін.
Паводле ягоных словаў, пасля анэксіі Крыма недастаткова жорсткая рэакцыя міжнароднай супольнасці мела доўгатэрміновыя наступствы не толькі для Украіны, але і для ўсёй Еўропы.
Гісторыя нагадвае, што "замірэнне і слабасць перад тварам агрэсіі маюць катастрафічныя наступствы", дадаў Клімкін.
Ён адзначыў, што цяпер асноўным прыярытэтам з'яўляецца вызваленне захопленых расейскімі сілавікамі ў раёне Керчанскага праліва 24 украінскіх маракоў, а таксама 70 украінскіх палітвязняў.
Кіраўнік украінскага МЗС заклікаў міжнародную супольнасць "прызнаць неўнікнёную небяспеку слабога адказу на расейскую агрэсію". Ён заявіў, што калі заходнія палітыкі цэняць дэмакратыю і вяршэнства закона, а таксама вераць, што заснаваная на правілах міжнародная сістэма робіць свет больш бяспечным, то яны павінны ўзмацніць ціск на Крэмль.
Паводле словаў Клімкіна, "з Расеяй трэба ўзаемадзейнічаць з пазіцыі сілы, а не з пазіцыі прымірэння".
Расея анэксавала Крым вясной 2014 года паводле вынікаў "рэферэндуму", вынікі якога не прызнаюцца Украінай і большасцю краінаў свету.
Пасля анэксіі Крыма пачаўся ўзброены канфлікт на Данбасе паміж украінскімі ўрадавымі сіламі з аднаго боку і баевікамі, падтрыманымі Масквой, і расейскімі войскамі з другога.
У сувязі з анэксіяй Крыма і канфліктам на Данбасе Еўразвяз, ЗША, Канада і іншыя дзяржавы ўвялі супраць РФ эканамічныя санкцыі.