У Лукашэнкі ўзмацняецца незадаволенасць Шуневічам?

Дыктатар зноў негатыўна выказаўся пра кіраўніцтва міліцыі.

У чацвер Лукашэнка на сустрэчах з генеральным пракурорам Аляксандрам Канюком і старшынём Следчага камітэта Іванам Наскевічам анансаваў хуткае правядзенне нарады з сілавым блокам, піша «Салiдарнасць».

Пры гэтым між іншым у правадыра дзяржавы вырваліся словы незадаволенасці МУС.

- Пры гэтым я папрашу засяродзіцца не на дакладах аб нашых вялікіх дасягненнях (яны таксама ёсць, яны вядомыя), а на тых пытаннях, над якімі нам трэба будзе працаваць, - цытуе Лукашэнку ягоная прэс-служба. - Вынікі - два словы. І праблемы, якія мы сёння бачым, каб мы іх абмеркавалі і прымалі пастановы калегіяльна. А не так, як у міліцыі там хто-небудзь што-небудзь скажа, і пайшоў шум. Потым яшчэ хто-небудзь што-небудзь скажа... Трэба, каб была нейкая адзіная канцэпцыя ў нас.

Што меў на ўвазе Лукашэнка, можна толькі здагадвацца. Але апошнія заявы з МУС, якія выклікалі абмеркаванні, былі зробленыя ягоным кіраўніком Ігарам Шуневічам.

У канцы мінулага года ён прызнаўся, што гэта была ягоная ідэя - зрабіць ролік пра выбачэнні падлетка перад скульптурай гарадавога.

У кожным выпадку для кіраўніцтва міністэрства ўнутраных спраў пазначылася трывожная тэндэнцыя. Прыняўшы апошні раз Шуневіча ў верасні мінулага года, Лукашэнка пасля гэтага перыядычна выказвае незадаволенасць дзеяннямі міліцыі.

Правадыр быў у шаленстве, калі з падачы МУС менскія ўлады ўвялі забарону на продаж алкаголю ў гандлёвых пунктах з 23.00 да 7.00. Лукашэнка асабіста яго скасаваў: «Міліцыю я папярэдзіў. Яна павінна працаваць у тых сацыяльна-эканамічных умовах, якія складваюцца ў дзяржаве».

Пасля Лукашэнкі абурыў законапраект аб супрацьдзеянні хатняму гвалту, які распрацоўвалі ў нетрах МУС: «Усё гэта дур, узятая, перш за ўсё, з Захаду».

Затым Лукашэнка і зусім адкрыта выказаў незадаволенасць міністрам. Ён заявіў, што пара скончыць з заганнай практыкай, калі дзяржава саджае карупцыянера ў турму, а «потым Шуневіч за добрыя паводзіны іх выпускае».

І вось свежыя словы пра тое, што дзейнічаць трэба «не так, як у міліцыі». Над галавой міністра адназначна згушчаюцца хмары.