Як бабуля дваіх унукаў з Гародні схуднела на 45 кілаграмаў за паўгода

Яна распавяла, што ёй дапамагло дамагчыся такога ўражлівага выніку.

Ірыне з Гародні 45 гадоў, яна працуе аператарам на тытунёвай фабрыцы. У 2016 годзе жанчына важыла 120 кг, але ўсяго за шэсць месяцаў яна здолела схуднець на 45 кг. Бабуля дваіх унукаў распавяла tut.by пра тое, што дапамагло дамагчыся такога ўражлівага выніку.

Ірына з дзяцінства не была худзенькай. Усе сяброўкі мелі фігуры больш зграбныя, але, нягледзячы на гэта, комплексаў з нагоды знешнасці ў Ірыны не было. Яна сустракалася з хлопцамі, падабалася сабе ў люстэрку.

У 18 гадоў Ірына выйшла замуж. На той момант яна важыла 80 кг. У 19 нарадзіла першае дзіця, стала папраўляцца. Праз тры гады нарадзіла другое, вага стала яшчэ большай.

- Я не займалася спортам, ніяк не абмяжоўвала сябе ў ежы. На той момант не задумвалася пра свой вонкавы выгляд. Ела ўсё і ва ўсякі час дня.

Вага Ірыны павольна, але імкліва павялічвалася і да 35 гадоў дасягнула адзнакі 100 кг. З'явіліся праблемы са здароўем: задышка, падвышаны ціск, боль у спіне.

У 2003 годзе Ірына з мужам атрымалі кватэру. Там трэба было рабіць рамонт, і рытм жыцця некалькі змяніўся.

- Я стала шмат рухацца. То адно трэба набыць, то іншае. Дзесьці паклеіць, пафарбаваць. Жыццё стала больш актыўным, і толькі за кошт гэтага мне ўдалося схуднець на 10 кг.

Але з заканчэннем рамонту Ірына вярнулася да звыклага рытму жыцця. Так у 40 гадоў жанчына ўбачыла на вагах лічбу - 120 кг. З гэтым ужо нешта трэба было рабіць. Жанчына пачала спрабаваць дыеты: кефірную, грачаную. Выстарчала на 2-3 дні. Увесь час хацелася есці. Усвядоміўшы, што схудненне ўсё ж працэс няхуткі, Ірына стала цікавіцца асновамі правільнага харчавання. Прачытала мноства матэрыялаў на гэтую тэму ў інтэрнэце і наважыла паспрабаваць.

- Сямейнікам я нічога не казала, каб, калі раптам не схуднею, не смяяліся з мяне. Аднак дачка і муж усё адно заўважылі, што я перастала есці хлеб, прысмакі, любімыя каўбасы і сасіскі. Давялося прызнацца, што хачу схуднець і чакаю падтрымкі.

Блізкія Ірыну падбадзёрвалі і разам з ёй верылі, што ўсё атрымаецца. І сапраўды, за два месяцы жанчыне ўдалося пазбавіцца ад 15 кг, прытрымліваючыся толькі правільнага харчавання. Потым вага спынілася і Ірына наважыла пачаць трэніравацца. Пайшла ў залу да трэнера. Практыкавалася тройчы на тыдзень.

- Пачуцця сарамлівасці ў зале я не адчувала. Выразна разумела, для чаго прыйшла і які вынік хачу атрымаць. Тым больш для мяне было важна, каб палепшыўся стан здароўя. Я клалася спаць і адчувала боль у спіне, прачыналася з такімі ж адчуваннямі. Хацелася, каб сітуацыя змянілася.

Ірына пачала худнець у траўні 2016 года, а займацца стала ў жніўні. У выніку да снежня жанчыне ўдалося пазбавіцца ад 45 кг.

- Вядома, маё жыццё радыкальна змянілася. Я перастала насіць «бабуліны» сукенкі, калі зразумела, што залажу ў 46-48 памер адзення. Зніклі боль у спіне і задышка. Большасць знаёмых, праўда, наадварот падумалі, што я захварэла. У нас жа як у грамадстве: калі папраўляешся, значыць, добра, здаровая. Калі худнееш, то адразу на штосьці хварэеш.

Цяпер Ірына важыць 76 кг. Хоча менш, але трэніроўкі пакуль прыпыніла. Харчуецца правільна, але дазваляе сабе салодкае ў разумных колькасцях: зефір або цукерку. На сняданак Ірына гатуе кашу, туды дадае арэхі, разынкі або мёд. На абед - суп з гародніны, курыцу ці рыбу з гарнірам. На вячэру, як правіла, таксама гародніна. Падчас перакусаў садавіна ці арэхі. П'е шмат вады цягам усяго дня.

- Я перакананая, што паправілася б зноў, калі б перастала прытрымлівацца правільнага харчавання. Люблю каўбасы і мучныя вырабы, але абмяжоўваю сябе ў гэтым. Не хочацца зноў убачыць на вагах трохзначны лік. Напэўна, у галаве ўжо нешта пераключылася: я ўсвядоміла, што пара змяняцца. У мяне двое ўнукаў: Віктару 4 гады, Даніку 2 гады і восем месяцаў - і з лішняй вагой было ўжо цяжка за імі бегаць. Для таго, каб са схудненнем усё атрымалася, думаю, важна, каб чалавек быў гатовы псіхалагічна, - і тады да мэты абавязкова прыйдзеш.