Болтан выставіў ультыматум войску Мадуры
11- 24.02.2019, 10:20
- 20,938
Вайскоўцаў Вэнэсуэлы паставілі перад выбарам.
Вэнэсуэла можа сутыкнуцца з новымі санкцыямі, калі яе вайскоўцы не «прымуць бок дэмакратыі». Пра гэта ў сваім Twitter напісаў дарадца прэзідэнта ЗША ў нацыянальнай бяспецы Джон Болтан.
«Вайскоўцы Вэнэсуэлы маюць выбар: прыняць дэмакратыю, абараніць цывільных жыхароў і дазволіць дастаўку гуманітарнай дапамогі; або ж яны сутыкнуцца з яшчэ большымі санкцыямі ды ізаляцыяй», - напісаў Болтан.
Да допісаў ён прымацаваў спасылку на нататку Reuters. Агенцтва са спасылкай на ананімную крыніцу ў амэрыканскай адміністрацыі паведамляе аб тым, што Белы дом можа абвясціць пра новыя санкцыі супраць Каракаса ўжо на наступным тыдні. Нагодай да гэтага можа паслужыць працяг блакавання дастаўкі гуманітарнай дапамогі ў краіну. У панядзелак, 25 лютага, сітуацыю ў Вэнэсуэле абмяркуюць у сталіцы Калумбіі Багаце віцэ-прэзідэнт ЗША Майк Пэнс і шэраг лідараў лацінаамэрыканскіх дзяржаў.
Venezuela’s military has a choice: Embrace democracy, protect civilians, and allow in humanitarian aid; or face even more sanctions and isolation. https://t.co/KNdncJbPDH
— John Bolton (@AmbJohnBolton) 23 февраля 2019 г.
Дастаўку гуманітарнай дапамогі да меж Вэнэсуэлы арганізоўвае апазіцыя, якую ўзначальвае часовы прэзідэнт Вэнэсуэлы Хуан Гуайдо.
На мяжы з Калумбіяй актывістам супрацьстаяць вайскоўцы, разгорнутыя на загад Нікаласа Мадуры. Некалькі фургонаў з гуманітарнай дапамогай былі спаленыя.
