Відэафакт: Як «эвакуююць» аўтамабілі беларусаў

Хто адкажа за скалечанае аўто?

Як пазбегнуць эвакуацыі за няправільную паркоўку? Адказ просты: не парушайце. Але некаторыя аўтаўладальнікі гатовыя рызыкаваць і прыдумляць альтэрнатыўныя развязанні. Хтосьці колы выварочвае да ўпору ў бок, хтосьці паркуецца так, што паміж аўтамабілямі і пешаходу не прайсці. Сэнс адзін - не даць Эвакуатару "падчапіць" і "пацягнуць", піша abw.by.

Праблема ў тым, што часам ні ДАІ, ні службу эвакуацыі гэта не спыняе. Адзін з такіх выпадкаў адбыўся ў Берасці.

Тут жаданне вартавых парадку прыцягнуць да адказнасці парушальніка пераважыла магчымыя рызыкі, напрыклад пашкодзіць аўтамабіль або іншыя МС, прыпаркаваныя побач.

У распараджэнні рэдакцыі з’явілася два відэа. Першае - непасрэдна падрыхтоўка да эвакуацыі няправільна прыпаркаванага аўтамабіля Opel. Другое - сам працэс эвакуацыі. Чальцам клуба аматараў Opel і проста людзям з тонкай душэўнай арганізацыяй другі ролік рэкамендуем не глядзець.

Паколькі Opel Omega мае задні прывад, то эвакуатар чапляе аўто за заднія колы, што на афіцыйнай мове называецца "прымусовай эвакуацыяй метадам частковай пагрузкі". У сталіцы, напрыклад, такая паслуга ацэньваецца на 50 беларускіх рублёў. Але вось няўдача: пярэднія колы аўто вывернуты, а з гэтага вынікае, што так эвакуаваць аўтамабіль нельга.

Звернемся да Інструкцыі аб парадку прымусовай адбуксоўкі (эвакуацыі) транспартнага сродку і змяшчэння яго на ахоўную стаянку, адбуксоўкі транспартнага сродку без змяшчэння яго на ахоўную стаянку, і блакавання колаў транспартнага сродку (далей - Інструкцыя), зацверджаная Пастановай СМ РБ №986.

Пастанову аб адбуксоўцы прымае інспектар ДАІ, і гэта галоўнае. Як сведчыць відэазапіс, ён выдатна бачыў вывернутыя колы аўтамабіля і спрабаваў штурхялямі паставіць іх у правільнае (прамое) становішча. Эфект ад такіх дзеянняў быў нулявым.

На гэтым моманце інспектару варта было адмовіцца ад ідэі эвакуацыі або выклікаць эвакуатар з поўнай пагрузкай. Але ён прыняў пастанову далей выконваць задачу, нягледзячы на ўзніклыя перашкоды.

Упартасці інспектара можна пазайздросціць. Хоць лепш бы ён сваю энэргію накіраваў на вывучэнне Інструкцыі, якой яго дзеянні ў гэтай сітуацыі рэгламентуюцца, паколькі разумець, што пры такім "барбарскім" спосабе дастаўкі аўтамабіля да стаянкі самому аўтамабілю прычыняецца шкоду, ён проста абавязаны.

Пры руху эвакуатара няшчасны Opel добра "перакасіла" налева. Пярэднія колы не круціліся, а "працягваліся" па асфальце. І пасля такой эвакуацыі іх застаецца толькі выкінуць на сметнік.

Гэта называецца прычыненнем шкоды маёмасці грамадзян, прычым службовымі асобамі дзяржаўных органаў. Хто адкажа? Чытаем Інструкцыю.

5. За пашкоджанні, нанесеныя транспартнаму сродку падчас яго прымусовай адбуксоўкі (эвакуацыі), знаходжання транспартнага сродку на ахоўнай стаянцы, а таксама ў час яго адбуксоўкі без змяшчэння на такую стаянку, нясуць адказнасць юрыдычныя асобы, супрацоўнікі (работнiкi) якіх выконвалі прымусовую адбуксоўку (эвакуацыю), захоўванне, адбуксоўку транспартнага сродку без змяшчэння яго на ахоўную стаянку.

Гэта значыць як мінімум адказваць за пашкоджанні аўтамабіля будзе кіроўца эвакуатара.

А калі ўлічыць, што сам агляд аўтамабіля і складанне адпаведных дакументаў інспектарам ДАІ таксама з'яўляецца працэсам прымусовай эвакуацыі, то адказнасць з кіроўцам эвакуатара можа падзяліць і інспектар. Нарэшце, пастанову аб эвакуацыі прыняў менавіта ён.

Усё гэта сумна, бо задача дзяржаўных структур - ахоўваць і абараняць маёмасць грамадзян. Нават калі яны парушальнікі.