Расстанне з далярам: што беларусы ў лютым рабілі ў абменніках?

Сума чыстага продажу валюты вырасла на 47,7%.

Трыццаць сёмы месяц насельніцтва Беларусі застаецца чыстым прадаўцом гатовай валюты, прычым у лютым чысты продаж гатовай валюты грамадзяне павялічылі амаль напалову, паводле матэрыялаў Нацбанка, паведамляе tut.by.

У лютым грамадзяне здалі на 2,7% менш валюты, чым у студзені, - 547,8 млн даляраў. Купля упала на 11,3% - да 427,1 млн даляраў.

Аб'ём чыстага продажу валюты ў лютым вырас на 47,7%, да 120,7 млн даляраў.

З улікам безгатоўкавых аперацый продаж перавысіў куплю за два месяцы на 61,7 млн даляраў.

Экспэрты казалі пра тое, што валютныя запасы беларусаў могуць скончыцца і пры ўмове захавання высокага попыту на валюту з боку прадпрыемстваў ціск на рубель будзе павялічвацца.

За 2018 год беларусы здалі 1,738 млрд даляраў чыстымі, што больш чым на чвэрць ніжэй, чым два гады таму. За 2017 год чысты продаж склаў 2,2 млрд даляраў, у 2016 годзе - 2,4 млрд даляраў.

Суб'екты гаспадарання ў мінулым годзе былі чыстымі пакупнікамі валюты (сума куплі перавысіла продаж на 672,4 млн даляраў), па выніках двух месяцаў купля на 115,7 млн даляраў перавысіла продаж.

Традыцыйна ў беларусаў расце цікавасць да валюты пры павелічэнні заробкаў, якія ў снежні перавысілі 1000 рублёў, але ў студзені зноў апусціліся. МВФ раіць уладам Беларусі абмежаваць рост заробкаў цягам двух гадоў на ўзроўні інфляцыі.