У Гомелі БРСМ збірае асабістую інфармацыю пра студэнтаў, якія не знаходзяцца ў арганізацыі

Навошта - не гавораць.

Пра гэта «Сильным новостям» распавёў студэнт універсітэта, стараста адной з груп. Маладзён пажадаў застацца ананімным.

- 12 сакавіка ў «Вконтакте» мне напісала нейкая дзяўчына. Не прадставілася. Незразумела, хто яна і адкуль. Папрасіла даць ёй фатаграфіі студэнтаў для спісу, які ў яе быў для нейкай рэспубліканскай базы БРСМ.

Я паглядзеў спісы і сказаў, што ў іх ёсць студэнты, якія ў БРСМ не знаходзяцца. Папрасіў яе падаць дакументы, на аснове якіх яна можа прасіць гэтыя фатаграфіі. У адказ пачуў: «Цяпер мы разбярэмся». Відавочна, што яна напісала яшчэ камусьці, пасля чаго мне сказалі: «Сваю фатаграфію можаш не скідаць, але астатнім перадай». Я паўтарыў, што без падставы нічога перадаваць не буду. Тады мне пераслалі паведамленне ад сакратара першаснай арганізацыі «БРСМ» у БелДУТ. У ім гаварылася, што гэтыя базы ў кожным выпадку будуць запоўненыя з нашага, або без нашага ведама. Пыталася, што ў гэтым такога і чаму я задаю столькі пытанняў. Я напісаў, што гэтая інфармацыя мяне не задавальняе, і далей я буду размаўляць толькі ў прысутнасці адміністрацыі ўніверсітэта.

Пасля таго, як яны даведаліся, што сам я ў БРСМ не знаходжуся, сказалі, маўляў, наша памылка была ў тым, што мы звярнуліся да вас, тым часам як вы там не знаходзіцеся. На што я адказаў, што памылка не ў гэтым, а ў вашым няправільным падыходзе да працы.

Пасля гэтага дыялогу, сакратарка напісала мне сама. Спытала, маўляў, у вас, хлопец нейкія праблемы? Калі ёсць, прыходзьце да мяне. Я адказаў, што ў мяне праблем ніякіх няма. Хай дадуць мне падставы на падачу асабістай інфармацыі і я з імі пагутару. Але, зноў жа, у прысутнасці адміністрацыі. Затым яна напісала мне вельмі шмат паведамленняў, запрашала на асабістую гутарку «папіць гарбаты» і ва ўсім разабрацца. Таму што «я сур'ёзны малады чалавек» і яна «не хоча канфліктаў», прыцягваць адміністрацыю і г.д..

Пасля гэтага маладзён звярнуўся ў дэканат. Там адправілі да прарэктара. На размову запрасілі і сакратарку БРСМ.

- Сакратарка выказала сваю версію, вельмі кароткую. Пра тое, што было ў паведамленнях, не расказала. Тады я сам падаў перапіску прарэктару. Прарэктар ў перапісцы нічога абражальнага не пабачыла, нічога такога, што магло б выклікаць негатыўныя водгукі. Я сказаў: «Не ўбачылі вы - убачаць журналісты».

Хто адправіў самае першае паведамленне ў гэтай гісторыі, хлопец так і не зразумеў. Ніхто гэты факт не пракаментаваў. Навошта і што гэта за «база» - таксама незразумела.

- Можа, ім сапраўды трэба запоўніць нейкую базу. Магчыма. Але яны не змаглі зрабіць гэта па-чалавечы. Некампетэнтна. Я ўвогуле спачатку падумаў, можа, ім патрэбныя нашы фатаграфіі, каб усіх уключыць у БРСМ без нашага ведама.

Пакідаць гэтую гісторыю як ёсць, хлопец не збіраецца. Рыхтуе заяву на імя рэктара.

- Перад мной папрасілі прабачэння. Усё добра абышлося. Але я сказаў, што не хачу пакідаць гэта так. Напішу заяву на імя рэктара ў дачыненні да сакратаркі БРСМ, каб у далейшым гэта не паўтарылася. На нашым курсе адсоткаў 30-40 знаходзяцца ў БРСМ. А пасля гэтай гісторыі два чалавекі з групы напісалі заявы аб выхадзе з аб'яднання.

У каментары ў Першаснай арганізацыі адмовілі. Пагаварыць з прарэктарам таксама не ўдалося: «Няма на месцы», - у адказ на некалькі званкоў.