Хуан Гуайдо: Расея і Кітай не падтрымліваюць рэжым Мадура

На думку прэзідэнта Венесуэлы, Пекін і Масква абараняюць уласныя бізнэс-інтарэсы ў гэтай краіне.

Прэзідэнт Венесуэлы заявіў, што Расея і Кітай не падтрымліваюць рэжым Нікаласа Мадура. Хуан Гуайдо сказаў пра гэта ў чацвер на мітынгу прыхільнікаў апазіцыі ў Каракасе, паведамляе «Голос Америки».

Са слоў Гуайдо, Пекін і Масква проста пераследуюць свае бізнэс-інтарэсы ў Венесуэле.

Хаця многія заходнія краіны, уключаючы ЗША, прызналі Гуайдо ў якасці легітымнага прэзідэнта Венесуэлы, Расея і Кітай працягваюць выказваць падтрымку Нікаласу Мадура.

«Ён (урад Мадура) ізаляваны; ён не можа развязаць праблемы, якія сам жа і стварыў; у яго няма хаўруснікаў у свеце. Няслушна сцвярджаць, што Расея і Кітай разам з ім, гэта вялікая памылка. У яго нікога няма. Яны (Расея і Кітай) вельмі выразна разумеюць, у чым заключаюцца іх інтарэсы, і гэта сапраўды так, я гэта вельмі добра разумею. Як і ўсе краіны, яны таксама павінны разумець, што адзіная абарона грамадзян - гэта вяршэнства закона», - заявіў Хуан Гуайдо.

Мадура адмаўляецца саступаць уладу, нягледзячы востры недахоп у краіне харчавання, вады і электрычнасці. Ён заяўляе, што з'яўляецца «ахвярай змовы» Злучаных Штатаў.

Раней у гэтым месяцы ЗША ўзмацнілі ціск на ўлады Венесуэлы, наклаўшы санкцыі на шэсць высокапастаўленых супрацоўнікаў службы бяспекі, а таксама ануляваўшы візы дзясяткам іншых высокапастаўленых чыноўнікаў у дадатак да папярэдніх санкцый.

За апошнія 10 гадоў кіруючы рэжым атрымаў ад Кітая больш за 50 млрд даляраў у выглядзе пазык у абмен на нафту. Расея таксама падпісала з Венесуэлай мільярдныя ўгоды ў стварэнні сумесных прадпрыемстваў у сферы нафтаздабычы.