Беларусы патрабуюць абвесціць амбасадара Бабіча персонай нон грата
- 17.03.2019, 8:39
- 25,796
Грамадзяне нашай краіны абураныя паводзінамі спецпрадстаўніка Пуціна.
На сайце petitions.by з'явіўся тэкст петыцыі з патрабаваннем абвесціць амбасадара Расеі ў Беларусі Міхаіла Бабіча персонай нон грата:
«Калі браць пад увагу камандны тон пасла Расеі Бабіча М.В, які не разумее розніцы паміж федэральнай акругай Расейскай Федэрацыі і незалежнай дзяржавай Рэспубліка Беларусь, просім, у адпаведнасці з арт.9 і арт.43 Венскай канвенцыі ад 18.04.1961 “Аб дыпламатычных зносінах” абвесціць амбасадара Расейскай Федэрацыі Бабіча Міхаіла Віктаравіча persona non grata».
Установы, у якія плануецца накіраваць зварот: Міністэрства замежных справаў Рэспублікі Беларусь.
Нагадаем, 14 сакавіка амбасадар Расеі ў Беларусі Міхаіл Бабіч у сваім інтэрв'ю РІА «Навіны» заклікаў інтэнсіфікаваць фармаванне «саюзнай дзяржавы». У адказ афіцыйны прадстаўнік беларускай вонкавапалітычнай установы Анатоль Глаз апублікаваў каментар, параўнаўшы Бабіча з «бухгалтарам, што падае надзеі».