Экс-міністр фінансаў Беларусі працаўладкаваўся ў Пастаянны камітэт «саюзнай дзяржавы»

Уладзімір Амарын пакінуў пасаду міністра фінансаў у жніўні 2018 года.

Экс-міністр фінансаў Беларусі Уладзімір Амарын з нядаўніх часоў з'яўляецца намеснікам Дзяржаўнага сакратара - сябрам пастаяннага камітэта «саюзнай дзяржавы». Інфармацыя пра гэта размешчаная на сайце Пастаяннага камітэта.

Уладзімір Амарын пакінуў пасаду міністра фінансаў у жніўні 2018 года, неўзабаве пасля змены кіраўніцтва ўрада. Ён больш за 30 гадоў прапрацаваў у фінансавай сістэме БССР і суверэннай Беларусі на розных пасадах.

Што датычыць прызначэння Максіма Ермаловіча новым міністрам фінансаў, Аляксандр Лукашэнка заўважыў, што Уладзімір Амарын з'яўляецца добрым спецыялістам, нагадвае tut.by.

«Мы вінаватыя самі, што, не разабраўшыся, кінулі яго ў гэтае пекла, улічваючы яго асобныя рысы характару. Ён занадта спакойны чалавек для гэтай пасады, але ён добры спецыяліст. І ён прапасці не мусіць. Ні ў якім разе нельга страціць такога спецыяліста», - падкрэсліў дыктатар.

Амарын і не прапаў. Знайшлася праца ў Маскве.

Дарэчы, ў пастаянным камітэце «саюзнай дзяржавы» працаўладкаваліся многія беларускія дзеячы. Кіраўніком сакратарыята старшыні Вышэйшага дзяржсавета СД з'яўляецца былы міністр культуры Уладзімір Мацвяйчук. Памочнікам Дзяржаўнага сакратара СД Рыгора Рапоты стаў экс-міністр спорту і турызму Беларусі Яўген Ворсін. Дэпартамент эканомікі і галіновых праграм узначальвае Алена Гулевіч, былы намеснік старшыні Белтэлерадыёкампаніі. Намеснік начальніка дэпартамента фінансаў і бюджэтнай палітыкі з'яўляецца Аляксандр Кернажыцкі, які шмат гадоў быў начальнікам галоўнага фінансавага ўпраўлення Менгарвыканкама.