Карбалевіч - пра Лукашэнку ў Баранавічах: У гэтым ёсць пэўная неадэкватнасць

Палітолаг прааналізаваў выступ дыктатара ў Баранавічах.

22 сакавіка Аляксандр Лукашэнка наведаў Баранавічы. Назваўшы яго асаблівым горадам, дыктатар пагаварыў пра сённяшняе месца Беларусі ў рэгіёне і свеце, пра ролю сельскай гаспадаркі і пра тое, ці трэба сёння беларусам зацягваць паясы.

Палітолаг Валерый Карбалевіч па просьбе «Салідарнасці» ў экспрэс-каментары адрэагаваў на словы дыктатара. На яго думку, як і любую іншую публічную сустрэчу, візіт у Баранавічы можна расцэньваць у якасці элемента перадвыбарнай кампаніі.

- Што тычыцца яго тэзісаў, то ў іх няма нічога новага. Напрыклад, словы пра тое, што галоўнай пагрозай для нас з'яўляецца эканоміка, - адзначыў палітолаг. - Хіба што вылучаецца кур'ёзнае выказванне пра тое, што мы з'яўляемся цэнтрам рэгіёну і ўвесь свет сёння глядзіць на Беларусь, што многія чакаюць ад нас тэхналагічнай і «мазгавой» дапамогі. У гэтым ёсць пэўная неадэкватнасць, але ў той жа час і ўсведамленне сябе аўтарытэтам і бачным сусветным палітыкам.

Каментуючы словы Лукашэнкі пра тое, што «беларусаў не трэба палохаць зацягваннем паясоў», суразмоўца адзначыў некалькі момантаў.

Па-першае, за імі хаваецца яго страх пераўтварэнняў у эканоміцы. Маўляў, ніякіх рэформаў, працуйце з тым, што ўжо ёсць, развівайце створанае. Па-другое, гэтыя словы можна расцэньваць у якасці аднаго з перадвыбарных абяцанняў народу. Але ў гэтым ёсць пэўная асаблівасць:

- Пры гэтым кіраўнік не абяцае нейкіх канкрэтных лічбаў. Ні 500 даляраў заробку, ні тысячу, ні тысячу рублёў. Нічога. Лукашэнка апёкся на такіх заявах. Тым больш, на фоне абяцання Расеі значна зрэзаць субсідыі абяцаць нешта насельніцтву не выпадае.