Лукашэнка распавёў пра больш за сотню затрыманняў пастаўшчыкоў падшыпнікаў

Дыктатар распавёў, «колькі кіраўнікоў ён перасаджаў».

Лукашэнка анансаваў «больш за сотню затрыманняў» паводле справы аб пастаўках запасных частак. Пра гэта ён заявіў у пятніцу, 22 сакавіка падчас сустрэчы з актывам Баранавіцкага раёна і высокапастаўленымі чыноўнікамі. Інфармацыя пра гэта з'явілася ў сюжэце на тэлеканале «Беларусь 1», піша tut.by.

«Колькі мы кіраўнікоў перасаджалі апошнім часам. Зараз па нейкіх падшыпніках пасярэднікі па ўсіх напрамках, галінах. Колькі там, таксама, напэўна, больш за сотню затрыманняў?» - звярнуўся Лукашэнка да старшыні КДБ Валерыя Вакульчыка. Той сцвярджальна кіўнуў.

«Як зачапілі адно звяно, - працягнуў Лукашэнка, - і па ўсёй краіне пакацілася. А людзі не маўчаць. Людзі прыходзяць і здаюць усіх з трыбухамі. Навошта ім сядзець за кагосьці ў турме?»

Апошнім часам сілавікі не паведамлялі пра буйныя затрыманні ў сферы закупак запасных частак.

У лістападзе 2018 года Дэпартамент фінансавых расследаванняў выявіў неабгрунтаванае пасрэдніцтва пры закупцы камплектуючых (у тым ліку, падшыпнікаў) да камунальнай тэхнікі ў Гомельскай вобласці.

Так, фінансавая міліцыя ўстанавіла, што адно з жыллёва-эксплуатацыйных прадпрыемстваў, ажыццяўляючы закупку імпартных запчастак да тэхнікі ў рэгіянальных пастаўшчыкоў прадукцыі, таксама паралельна набывала такія ж запчасткі ў пяці падкантрольных індывідуальных прадпрымальнікаў па цане, што ў некалькі разоў перавышае іх сапраўдны кошт.

У сваю чаргу гэтыя пяць ІП набывалі камплектуючыя ў тых жа рэгіянальных пастаўшчыкоў, а тавар наўпрост ішоў са склада рэгіянальнага пастаўшчыка на склад камунальнага прадпрыемства. Гэтая схема паставак дзейнічала на працягу 2016 - 2018 гадоў. Пры гэтым гандлёвая надбаўка пасярэднікаў да цаны рэгіянальнага пастаўшчыка даходзіла да 800% (у сярэднім складала ад 200 да 400%), паведамляе ДФР КДК.

За пастаўленыя запасныя часткі камунальнае прадпрыемства наўпрост іпэшнікам грошы не пералічвала, што ў сваю чаргу з’яўляецца дадатковай перашкодай выкрыцця ўсёй схемы паставак. Грошы паступалі на разліковыя рахункі прадпрымальнікаў ад суб'ектаў, якім прадпрыемства аказвала камунальныя паслугі і якія з'яўляліся яго даўжнікамі. У гэтых мэтах заключаліся адпаведныя дамовы пералічэння доўгу, а сумы дэбіторскай і крэдыторскай запазычанасці прадпрыемства пагашаліся. Пасля грашовыя сродкі, якія паступілі на разліковыя рахункі індывідуальных прадпрымальнікаў, імі здымаліся і размяркоўваліся паміж дырэктарам прадпрыемства і іншымі зацікаўленымі асобамі.

У выніку закупак запчастак па завышаным кошце камунальнаму прадпрыемству нанесеная шкода на агульную суму больш за 500 тысяч рублёў, што складае розніцу паміж коштам набыцця запасных частак і коштам іх водпуску рэгіянальнымі пастаўшчыкамі. Паводле крымінальнай справы падазраванымі прызнаныя 8 чалавек. Двум з іх (уключаючы дырэктара прадпрыемства) выстаўленае абвінавачванне, яны ўзятыя пад варту.

Варта таксама адзначыць, што ільвіная доля падшыпнікаў на беларускім рынку імпартнай вытворчасці. Попыт на іх вялікі, бо выкарыстоўваюцца на шматлікіх прамысловых прадпрыемствах.

У жніўні 2018 года Еўразійская эканамічная камісія (ЕЭК) падоўжыла на 5 гадоў дзеянне антыдэмпінгавай мыты на кітайскія падшыпнікі. Мыта складае ад 31,3% да 41,5% ад мытнага кошту ў залежнасці ад кітайскага прадпрыемства-вытворцы. Паводле вынікаў паўторнага расследавання камісія ўстанавіла, што пры адсутнасці антыдэмпінгавай меры кітайскія экспарцёры змогуць нарасціць аб'ёмы паставак падшыпнікаў на рынак саюза па дэмпінгавых цэнах. «Гэта прывяло б да пагаршэння эканамічнага становішча галіны», - падкрэслілі ў ЕЭК.