Міністр абароны Літвы: Дзверы ў NATO адчыненыя для Украіны
2- 26.03.2019, 16:27
- 8,626
Альянс вяртаецца да свайго класічнага аблічча і мэтаў.
29 сакавіка спаўняецца 15 гадоў з дня ўступлення Літвы, Латвіі і Эстоніі ў склад NATО - Паўночнаатлантычнага Альянсу. З гэтай нагоды сайт Сharter97.org пагаварыў з Раймундасам Кароблісам, міністрам абароны Літвы.
- Для Літвы сяброўства ў Паўночнаатлантычным Альянсе гэта...?
- Бяспека, а паколькі мы знаходзімся паміж Захадам і Усходам - пытанне бяспекі для нас выключна важнае. Зусім нядаўна была вайна ў Грузіі, потым агрэсія супраць Украіны. Калі б не тое, што Літва ў шэрагах NATO, наша сітуацыя хоць бы з пункту гледжання бяспекі была б зусім іншай.
- Што вы можаце сказаць пра выклікі, якія стаяць перад NATO?
- Натуральна, расейскі фактар. Альянс вяртаецца да свайго класічнага аблічча і мэтаў, якія ўключаюць абарону яго найбольш уразлівых у ваенным сэнсе чальцоў, у тым ліку і нас.
- У Еўропе гавораць аб стварэнні агульных, еўрапейскіх узброеных сіл. Гэта таксама можна расцэньваць як выклік для Альянсу?
- NATO - адзіны абарончы Альянс у Еўропе, і гэта ніхто не падвяргае сумневу. Гэтак жа сама зразумела, што краіны-чальцы NATO павінны прытрымлівацца сваіх абавязацельстваў. Падводзячы вынікі: галоўнае, каб гэтыя дзве ідэі не супярэчылі адна адной, а Паўночнаатлантычны Альянс заставаўся па-ранейшаму прыярытэтам.
- У перспектыве наступных 15-гадоў Альянсу: ці можна чакаць што Украіна зможа ўвайсці ў склад NATO?
- Хоць ва Украіне ў апошнія пяць гадоў адбыліся значныя змены, мы адзначаем, што гэтага пакуль недастаткова. Дэмакратычныя прынцыпы, такія як кантроль войска грамадзянскай супольнасцю, павінны выконвацца не толькі на паперы, але і ў рэальнасці. Патрабуецца прытрымлівацца стандартаў NATO ва ўзброеных сілах, і ў нарэшце важным застаецца пытанне менталітэту, адказнасці жаўнера. Украіна тут павінна прайсці свой шлях, каб увайсці ў дзверы Альянсу, расчыненыя для яе і для Грузіі.
- Што будзе, калі ў Беларусі з'явіцца усё больш і больш расейскіх вайскоўцаў?
- У такім выпадку становішча Літвы з пункту гледжання бяспекі значна ўскладніцца.