Бос берасцейскага «Дынама»: Пераход у іншы чэмпіянат? Вялі перамовы з Украінай, Польшчай і Літвой

Аляксандр Зайцаў распавёў, у які чэмпіянат мог перайсці яго клуб у выпадку абвастрэння канфлікту з БФФ.

Кіраўнік берасцейскага «Дынама» Аляксандр Зайцаў у інтэрв'ю карэспандэнту «Прессбола» распавёў, у які чэмпіянат мог перайсці яго клуб у выпадку абвастрэння канфлікту з БФФ у святле «справы Савіцкага».

- Усе берасцейскія гульцы казалі, што на працягу міжсезоння кіраўніцтва вяло сябе так: маўляў, усё будзе нармальна. Вы спадзяваліся, што спрэчка вырашыцца на вашу карысць, альбо прадумвалі варыянт, што ўсё-такі давядзецца плаціць?

- Пра тое, што давядзецца плаціць, ніхто не думаў. Больш за ўсё мы прапрацоўвалі варыянт з пераходам у іншы чэмпіянат. Гаворка не толькі пра Польшчу. Я тройчы сустракаўся з кіраўніцтвам федэрацыі футбола Украіны, некалькі разоў былі і ў Польшчы. Гэтыя варыянты, безумоўна, складаныя. У нас не супадаюць календары. Акрамя таго, гэта вялікія краіны, са сваімі пас'янсамі. Прыход новага моцнага калектыву парушае нейкі баланс. І нам давялося б выдаткаваць пэўны час, каб прабіцца з ніжэйшых ліг наверх. Адсюль паўстаў варыянт з «Віслай». Добрыя хлопцы. Мы пасябравалі, зараз ідзе супрацоўніцтва. У нас ёсць дамова аб невыдаванні, але гэтая тэма не закрытая.

Але далей за ўсё прасунуліся ў плане сыходу ў чэмпіянат Літвы. У нас была пэўная перапіска з тамтэйшай федэрацыяй футбола. Календары супадаюць, ліміту на легіянераў няма. Адзінае складанае пытанне - у парадку выключэння ўвесці каманду адразу ў вышэйшую лігу.

- А дзе б праводзілі матчы?

- Знойдзем. Гэта не важна. Шэраг літоўскіх гарадоў ад Берасця бліжэй, чым Магілёў ці Віцебск. Скажу так: гэта ўсё не ад добрага жыцця. Ва ўзаемаадносінах з БФФ, безумоўна, быў напал. Некаторыя людзі падумалі, што гэтая гісторыя скончылася. Магу сказаць, што для іх яна толькі пачынаецца. Ніколі не казаў, што тэма закрыта. Мы можам сёння заплаціць «Нёману», але гэта не значыць, што мы не будзем шукаць праўды.