З Расейскага музея ў Пецярбургу паспрабавалі скрасці скульптуру

Двое мужчын спрабавалі спусціцца па вяроўцы з моста праз прылеглы да замка роў.

Двое мужчын спрабавалі выкрасці скульптуру з тэрыторыі Расейскага музея ў Санкт-Пецярбургу. Пра гэта са спасылкай на афіцыйнага прадстаўніка Расгвардыі Валерыя Грыбакіна паведамляе ТАСС.

Паводле ягоных слоў, адзін з ахоўнікаў Міхайлаўскага замка, знаходзячыся на пасадзе, убачыў, як невядомыя спрабуюць спусціцца па вяроўцы з моста праз прылеглы да замка роў. Ён выклікаў супрацоўнікаў пазаведамаснай аховы Расгвардыі. Мужчыны былі затрыманыя ў той момант, калі адзін з іх, спусціўшыся да вады па вяроўцы, спрабаваў зачапіць гакам скульптуру з нішы ў рове.

«Цяпер мужчыны 1983 і 1986 гадоў нараджэння дастаўлены ў паліцыю», - адзначыў Грыбакін, дадаўшы, што ўстанова разгледзіць пытанне аб заахвочванні супрацоўнікаў, якія прадухілілі крадзеж.

Раней Міністэрства культуры паведаміла, што ў Расейскім музеі, а таксама яшчэ ў трох найбуйнейшых музеях краіны (у Эрмітажы, Дзяржаўным музеі выяўленчых мастацтваў імя А.С. Пушкіна і Дзяржаўным гістарычным музеі) былі выяўлены парушэнні ў рабоце сістэм бяспекі. Парушэнні - «вынік недапрацовак як саміх музеяў, так і падраздзяленняў Расгвардыі», прыйшла да высновы камісія.

У Расгвардыі на гэта заявілі, што не атрымалі ніякіх указанняў або рэкамендацый з боку Мінкультуры аб выніках гэтай праверкі. «Ніякіх нараканняў не прагучала», - казаў тады прадстаўнік установы.

Праверка Мінкультуры была арганізаваная пасля таго, як з Траццякоўскай галерэі ў Маскве была выкрадзена карціна «Ай-Петры. Крым» пэндзля Архіпа Куінджы. У канцы студзеня мужчына зняў карціну са сцяны ў музеі ў прысутнасці іншых наведвальнікаў і змог бесперашкодна пакінуць яго тэрыторыю.

Выкрадальніка ўдалося затрымаць ўжо на наступны дзень, ім быў прадпрымальнік з Крыма Дзяніс Чупрыкоў. Ён паказаў праваахоўнікам, дзе схаваў карціну. Супраць Чупрыкова завялі крымінальную справу паводле арт 164 КК РФ (крадзеж прадметаў, якія маюць асаблівую каштоўнасць), цяпер ён знаходзіцца пад арыштам.

У Расгвардыі, якая займаецца ў тым ліку аховай музеяў, заявілі, што супрацоўнікі ўстановы не нясуць адказнасці за захаванасць карцін і гарантуюць толькі бяспеку наведвальнікаў музея.