Услед за Лукашэнкам віцэ-прэм'ер Петрышэнка выказаўся пра рамонт нафтаправоду

Улады закрыюць нафтаправод у адказ на санкцыі РФ?

Пра гэта распавёў журналістам пасля нарады ў Лукашэнкі віцэ-прэм'ер Ігар Петрышэнка, піша БелТА.

«Лукашэнку было даложана аб шэрагу момантаў, звязаных з транспартаваннем нафты па тэрыторыі Беларусі. Дзейны нафтаправод, які праходзіць па тэрыторыі Беларусі, функцыянуе, але мае патрэбу ў дадатковым рэгламентным абслугоўванні, бо эксплуатуецца працяглы час. Былі пэўныя высновы нашых інжынераў і тэхнічных супрацоўнікаў, што гэты нафтаправод неабходна было закрыць на рэгламентныя рамонтныя працы яшчэ паўтара гады таму», - адзначыў віцэ-прэм'ер.

Ён растлумачыў, што тады была прынятая пастанова не падводзіць партнёраў, а ўжываць захады ў працэсе функцыянавання нафтаправода, каб не закрываць пэўныя адрэзкі. «Цяпер у сувязі з падыходамі, звязанымі з экалогіяй, элементамі зялёнай эканомікі, мы бачым, што ёсць моманты, якія мы не можам рэалізаваць і забяспечыць тэхнічнае абслугоўванне гэтага нафтаправода без пэўных адрэзкаў, каб альбо абмежаваць, альбо перакрыць (транспартаванне па iх). Нашы спецыялісты, інжынеры працуюць над гэтым. Гэтая тэма таксама была ў полі зроку», - дадаў Ігар Петрышэнка.