Вялікабрытанія заклала аснову для санкцый супраць Расеі

За парушэнне гандлёвых санкцый супраць РФ прадугледжана сур'ёзнае пакаранне.

Урад Вялікабрытаніі распрацаваў законапраект, які дазволіць Лондану і пасля брэксіта працягваць санкцыі супраць Расеі, што рэалізуюцца цяпер у Еўразвязе. Мэта законапраекта - «матываваць Расею на спыненне дзеянняў дэстабілізацыі Украіны», гаворыцца ў тлумачальным мемарандуме для брытанскага парламента, апублікаваным у сераду, 17 красавіка, на сайце ўрада ў Лондане, паведамляе dw.com.

У дакуменце ўказваецца, што падрыхтаваныя ўрадам меры фактычна толькі заменяць тыя, якія цяпер дзейнічаюць у рамках заканадаўства Еўразвязу. Аднак напраўду яны ўтрымліваюць шэраг сур'ёзных адрозненняў. Да прыкладу, урад у Лондане прапануе ўвесці крымінальную адказнасць за парушэнне санкцыйнага рэжыму з Расеяй і караць за парушэнне гандлёвых санкцый штрафам або пазбаўленнем волі на тэрмін да 10 гадоў.

Пры гэтым законапраект прадугледжвае магчымасць сакрэтнага ўнясення ў санкцыйных спіс канкрэтных асоб, калі гэта патрабуецца «у інтарэсах нацыянальнай бяспекі або міжнародных дачыненняў». Заканадаўства ЕЗ такой магчымасці не прадугледжвае.

Сфера дзеяння брытанскіх санкцый

Аўтаномныя санкцыі Вялікабрытаніі супраць Расеі будуць абавязковыя да выканання не толькі на тэрыторыі краіны. Іх будуць абавязаны выконваць і брытанскія падданыя за мяжой. Акрамя таго, паўнамоцтвы кантролю за выкананнем санкцый будуць распаўсюджвацца на брытанскія марскія судны ў міжнародных або замежных водах, судны без нацыянальнасці ў міжнародных водах і замежныя судны ў міжнародных водах.

Пры гэтым у мэтах кантролю за выкананнем гандлёвага эмбарга ў дачыненні да анэксаванага Расеяй Крыму або забароны на пастаўкі ў Расею вайсковай прадукцыі або тавараў падвойнага прызначэння, брытанскія вайскоўцы змогуць спыняць і абшукваць замежныя судны і судны без нацыянальнасці з «выкарыстаннем абгрунтаванай сілы» і канфіскоўваць забароненыя тавары.

Непахісная падтрымка цэласнасці Украіны

У мемарандуме падкрэсліваецца непахісная падтрымка Вялікабрытаніяй тэрытарыяльнай цэласнасці і суверэнітэту Украіны. Адзначаючы, што Расея «таемна ці адкрыта выкарыстоўвае любую магчымасць для дэстабілізацыі Украіны», урад у Лондане паказвае, што расейскае ўмяшанне на ўсходзе гэтай краіны і незаконная анэксія Крыма і Севастопаля з'яўляюцца абуральнымі парушэннямі цэлага шэрагу міжнародных абавязанняў Раскі, якія вынікаюць са Статута ААН, укладзенага акта ў Хельсінкі, Будапешцкага мемарандума 1997 года і расейска-ўкраінскай дамовы аб сяброўстве, супрацоўніцтве і партнёрстве.

«Расея павінна паважаць незалежнасць і тэрытарыяльную цэласнасць Украіны. Крым і Данбас з'яўляюцца часткай Украіны», - канстатуецца ў дакуменце.