Украінскія сацыёлагі растлумачылі, адкуль Парашэнка ўзяў лічбу 40% падтрымкі
33- 17.04.2019, 15:54
- 17,418
Дзейны прэзідэнт Украіны заявіў у эфіры «112 Украіна», што яго падтрымлівае 40% выбаршчыкаў.
У Кіеўскім міжнародным інстытуце сацыялогіі (КМІС) растлумачылі паходжанне перадвыбарных рэйтынгаў, згодна з якімі кандыдата ў прэзідэнты і дзейнага кіраўніка дзяржавы Пятра Парашэнку падтрымліваюць амаль 40% выбаршчыкаў. Адзначым, гэтыя рэйтынгі напярэдадні апублікаваў «5 канал» і агучыў сам Пятро Парашэнка ў эфіры тэлеканала «112 Украіна», паведамляе «Громадськое».
Як паведаміў у каментары «Громадського» намеснік дырэктара КМІС Антон Грушыцкі, гаворыцца пра вынікі тэлефоннага апытання, згодна з якім у Парашэнкі прыкметная тэндэнцыя да росту рэйтынгу.
«Гэта вынікі тэлефоннага апытання. Мы не планавалі публікаваць гэта даследаванне, але паколькі дакумент ужо апублікаваны, то мы рыхтуем тлумачэнне больш дакладнае», - адзначыў Антон Грушыцкі.
Ён таксама растлумачыў, што лічбы з тэлефоннага апытання менш дакладныя, чым даследаванні шляхам інтэрв'ю, паводле якіх паміж Парашэнкам і Зяленскім разрыў у 47% галасоў.
«Як паказалі папярэднія апытанні да першага туру выбараў, тэлефонныя апытанні з'яўляюцца недакладнымі. Паколькі тэлефоны маюць больш заможныя людзі, якія будуць галасаваць за Парашэнку. Мінімальная хібнасць тэлефоннага апытання складае 5-6%», - растлумачыў Грушыцкі адрозненні ў лічбах тэлефоннага даследавання КМІС і рэйтынгаў, атрыманых шляхам апытання.
Ён падкрэсліў, што найважнейшай высновай з вынікаў тэлефоннага апытання з'яўляецца толькі «тэндэнцыя да росту рэйтынгу Парашэнкі».
Нагадаем, вечарам 16 красавіка Парашэнка ў эфіры тэлеканала «112 Украіна» заявіў, што ягоны перадвыбарчы рэйтынг, паводле звестак сацыялагічнай групы КМІС, перавышае 40%. Да таго часу КМІС апублікавала толькі тыя вынікі сацапытання, згодна з якімі, за Уладзіміра Зяленскага ў другім туры прэзідэнцкіх выбараў збіраюцца галасаваць 72,2% выбаршчыкаў. За Пятра Парашэнку - 25,4%.
Пасля першага этапу прэзідэнцкіх выбараў у другім туры будуць спаборнічаць шоўмэн Уладзімір Зяленскі і дзейны кіраўнік дзяржавы Пятро Парашэнка. Першы лідараваў з розніцай у 14,29%. Другі тур выбараў прэзідэнта Украіны адбудзецца 21 красавіка.