Экспэрт: Крызіс паслужыў штуршком чарговага ўсплёску міграцыі ў Беларусі

Працоўная міграцыя беларусаў мае нарастаючую дынаміку.

На ацэнку Сусветнага банка, летась беларусы атрымалі прыкладна 1,2 млрд даляраў пераводаў з-за мяжы. Сума, вядома, немаленькая - гэта 2,1% нашага ВУП, або шостая частка золатавалютных рэзерваў (яны, паводле звестак на 1 красавіка, склалі 7,2 млрд даляраў), піша kp.by.

Леташні вынік ледзь меншы за той, што быў у 2017-м. Акрамя таго, ён самы нізкі і сярод усіх нашых суседзяў! Бліжэй за ўсё да Беларусі ў аб'ёмах грашовых пералічэнняў была Латвія, туды летась прыйшло крыху менш за 1,3 млрд даляраў. Прыкладна на тым жа ўзроўні знаходзіцца і Літва - 1,4 млрд даляраў. А вось іншыя нашы суседзі прыкметна вырваліся наперад. Напрыклад, у Польшчу летась з-за мяжы прыйшло 7,4 млрд даляраў, у Расею - 8,6 млрд, ва Украіну - 14,4 млрд. Калі судзіць з гэтых лічбаў, ад суседзяў за мяжу едзе значна больш чалавек!

Кацярына Барнукова, акадэмічная дырэктарка даследчага цэнтра BEROC мяркуе, што калі б міграцыйныя магчымасці ў беларусаў былі такімі ж, як у нашых суседзяў, то мы б убачылі зусім іншыя маштабы міграцыі.

- Што больш за ўсё турбуе ў пытанні міграцыі з Беларусі, дык гэта нарастальная дынаміка. Міграцыя шмат у чым працуе паводле прынцыпу сеткі: лягчэй з'язджаць туды, дзе ўжо ёсць шмат беларусаў, якія могуць дапамагчы парадай, інфармацыяй і гэтак далей. Таму, чым больш беларусаў-мігрантаў ёсць дзесьці, тым больш прывабнай становіцца міграцыя для іншых.

- А чаму за апошнія два гады сума пералічэнняў з-за мяжы павялічылася? Кажа гэта пра тое, што і адток мігрантаў расце?

- Крызіс мог паслужыць штуршком чарговага ўсплёску міграцыі. Але і зніжэнне аб'ёму пералічэнняў у 2015 - 2016 гадах не абавязкова азначае, што ў тыя гады міграцыя паменшылася. Многія беларускія мігранты працуюць у Расеі, і праз падзенне курсу рубля ў гэты час сума пералічэнняў у далярах магла значна скараціцца.