Максім Пазнякоў: Трэба ісці да людзей, у народ

Новы лідар Беларускага незалежнага прафзвязу распавёў пра свае першыя крокі на пасадзе старшыні.

20 красавіка ў Менску прайшоў ХІ з'езд Беларускага незалежнага прафзвязу, на якім 35-гадовы Максім Пазнякоў быў абраны старшынём аб'яднання. Да гэтага моманту ён быў намеснікам старшыні першаснай арганізацыі БНП на ААТ «Нафтан».

Змена кіраўніцтва прайшла на фоне беспрэцэдэнтнага ціску на Беларускі незалежны прафзвяз. З пачатку года Незалежны прафзвяз гарнякоў пакінула тысяча чалавек праз ціск з боку ААТ «Беларуськалій». У сувязі з гэтым сотні неабыякавых людзей з усяго свету патрабуюць ад беларускіх уладаў спыніць пераслед паводле прафзвязнай прыкметы.

Новы лідар найстарэйшага незалежнага прафзвязу Беларусі распавёў «Салідарнасці» аб уражанні ад першых дзён кіраўніцтва, пра выклікі, якія стаяць перад арганізацыяй і першыя крокі на пасадзе.

- Па-першае, ёсць адчуванне гонару і падзякі дэлегатам з'езду за давер быць кіраўніком арганізацыі найбліжэйшыя чатыры гады. Таксама разумею вялікую адказнасць за прафзвяз, за тыя першыя крокі, якія трэба будзе зрабіць для развіцця нашай арганізацыі ў гэты няпросты час.

Галоўным выклікам для сябе Максім Пазнякоў цяпер уважае ціск на Незалежны прафзвяз гарнякоў:

- Адбіць гэта хвалю - гэта першачарговая задача сёння для нашай арганізацыі. Бо НПГ з'яўляецца адной з самых шматлікіх нашых арганізацый.

Са слоў прафзвязнага лідара, акцыя салідарнасці з прафзвязам як унутры краіны, так і на міжнародным узроўні стала нечаканасцю для ўладаў:

- Са звестак, якія да нас даходзяць, ціск зменшыўся. Такой вялікай хвалі выхаду з прафзвязу гарнякоў, якую мы назіралі, цяпер няма. Але нам трэба яшчэ ўсё праверыць, прааналізаваць. З дня на дзень збярэцца Рада прадстаўнікоў прафзвязаў гарнякоў, дзе будуць падведзеныя вынікі і стане ясна, ці спыніўся гэта ціск ці не.

Што да міжнароднага флэш-мобу ў падтрымку Незалежнага прафзвязу гарнякоў, то я думаю, ён прымусіў задумацца і кіраўніцтва «Беларуськалія», і салігорскія ўлады. Перакананы, што яны не чакалі, што гэтая падтрымка будзе расці як снежны ком.

Гаворачы пра найбліжэйшыя планы, Максім Пазнякоў падкрэсліў, што праца ў прафзвязе патрабуе штодзённай аддачы:

- Трэба ісці да людзей, у народ. Тлумачыць рабочым, што такое прафзвязнае аб'яднанне, у чым яго сіла. Трэба працягваць працу для ўкладання калектыўных пагадненняў, напрыклад, з «Нафтанам». Працягнецца праца і з «Белнафтахімам» аб укладанні тарыфнага пагаднення, якое будзе распаўсюджвацца на ўвесь канцэрн. Але галоўнае, паўтаруся, ісці да людзей, ствараць новыя ячэйкі, падтрымліваць працу дзейных.