У Расеі былых супрацоўнікаў АМАП высяляюць з кватэр

Супрацоўнікі АМАП удзельнічалі ў разгоне мірных акцый у Маскве.

Былыя супрацоўнікі маскоўскага АМАП запісалі відэазварот да прэзідэнта Расеі Уладзіміра Пуціна са скаргай на іх высяленне са службовага жылля, паведамляе «Радыё Свабода».

Пяць чалавек, якія назваліся ветэранамі АМАП, на відэа нагадалі Пуціну, апроч іншага, пра тое, што выконвалі «службова-баявыя задачы» ў гарачых пунктах, на Манежнай і Балотнай плошчах.

Зварот, апублікаваны на YouTube-канале «Агенцтва стратэгічных праграм», адрасаваны таксама кіраўніку ўрада Дзмітрыю Мядзведзеву і кіраўнікам Расгвардыі і МУС.

Сцвярджаецца, што ў 2010 годзе ім далі службовыя кватэры, а пасля іх звальнення са службы загадалі выехаць з іх, сцвярджаючы, што гаворка ідзе пра нежылыя памяшканнях.

«Чаму мы, знаходзячыся на службе ў дзяржавы, выконваючы службова-баявыя задачы, у тым ліку і ў гарачых пунктах, на Манежнай, на Балотнай плошчах, падчас правядзення Чэмпіянатаў свету ў футболе, Алімпійскіх гульняў і Кубка Канфэдэрацый і падчас іншых грамадска-палітычных і спартовых мерапрыемстваў, мы штодня праходзілі службу на вуліцах горада, але ў выніку самі апынуліся пасля выхаду на пенсію па-за законам. Чаму цяпер мы і нашы сем'і сталі валацугамі?» - кажа адзін з аўтараў відэа. «Медиазона» высветліла асобы пецярых былых супрацоўнікаў АМАП, якія запісалі зварот.

На Манежнай плошчы ў снежні 2010 года АМАП разганяў няўзгодненую акцыю пратэсту футбольных фанатаў, а на Балотнай плошчы ў траўні 2012-га - марш праціўнікаў Уладзіміра Пуціна. Улады ахарактарызавалі гэтыя падзеі, як масавыя беспарадкі, дзясяткі людзей былі асуджаныя паводле так званай «балотнай справы» - толькі дэманстранты, ніводзін супрацоўнік АМАП на лаву падсудных не трапіў.