Вольгу Нікалайчык аштрафавалі за допіс пра малебен у Курапатах
9- 8.04.2019, 18:05
- 18,955
Суддзя прысудзіла актывістцы $417 штрафу.
Суд Першамайскага раёна аштрафаваў грамадскую актывістку і рэжысёрку Вольгу Hікалайчык на 35 базавых велічыняў - амаль 900 рублёў «за заклік на несанкцыянаванае мерапрыемства ў сацыяльных сетках», паведамляе «Радыё Свабода».
Вольгу Нікалайчык затрымалі 5 красавіка а 20-й гадзіны. Яна пасля вечаровай малітвы засталася ў Курапатах, каб пасадзіць кветкі. Па дарозе дадому на выхадзе з падземнага пераходу яе закінулі ў мікрааўтобус, забралі тэлефон.
«Міліцыянты паводзілі сябе агрэсіўна, здзекавалася, пагражала пасадзіць на ланцуг. Павезлі ў Цэнтр ізаляцыі правапарушэнняў на Акрэсціна. Я адразу ж абвясціла, што буду трымаць галадоўку. У камеры першую ноч не магла спаць, мяне спрабавалі размясціць на верхняй шконцы. Потым ужо перавялі на ніжнюю шконку. Пратакол я не падпісала», - распавяла пасля вызвалення Вольга Нікалайчык.
У панядзелак, 8 красавіка, яе прывезлі ў Першамайскі суд Менска. Справу разглядаў суддзя Юрый Гарбатоўскі. Асудзілі яе за «заклік на несанкцыянаванае мерапрыемства ў сацыяльных сетках». Вольга настойвала, што гэта быў не прызыў на мерапрыемства, а інфармаванне пра малебен за Курапаты.
Прысуд - 35 базавых велічынь (892,5 рубля).
Са слоў Вольгі Нікалайчык, невядома, дзе трымаюць Арцёма Чарняка, якога апошні раз бачылі ў Аляхновічах - ён садзіўся ў маршрутку на Менск.
Нагадаем, што 4 красавіка ўлады знеслі крыжы па перыметры Курапатаў.
Актывісты паведамляюць, што было знесена і вывезена блізу 100 крыжоў.
1 сакавіка на прэс-канферэнцыі Лукашэнка выказаў незадаволенасць крыжамі вакол Курапатаў, якія бачныя з дарогі.
Адзін з лідараў Беларускага Нацыянальнага Кангрэсу Мікола Статкевіч заклікаў выйсці ў нядзелю на малебен 7 красавіка а 12-й на плошчу Свабоды ля менскага Свята-Духава кафедральнага (праваслаўнага) сабора.
Сустаршыня Беларускай Хрысціянскай Дэмакратыі Павел Севярынец падтрымаў правядзенне набажэнства ў нядзелю каля менскага Свята-Духава кафедральнага сабора.
У набажэнстве ўзялі ўдзел больш за 1000 чалавек. Мікалай Статкевіч быў затрыманы перад пачаткам набажэнства.