МЗС Украіны: Расею не запрашалі на інаўгурацыю Зяленскага

Інаўгурацыя Зяленскага прызначаная на 20 траўня.

Афіцыйных прадстаўнікоў расейскіх уладаў не запрашалі на інаўгурацыю новаабранага прэзідэнта Украіны Уладзіміра Зяленскага. Пра гэта 17 траўня паведаміла агенцтву «Интерфакс-Украина» спікерка Міністэрства замежных спраў Украіны Кацярына Зелянко.

«Расейская Федэрацыя не была запрошаная на мерапрыемствы з нагоды інаўгурацыі. Мы запрашалі тых нашых партнёраў і тыя дзяржавы, якія, вядома, актыўна супрацоўнічаюць з Украінай, з'яўляюцца нашымі партнёрамі і сябрамі», - сказала яна.

21 красавіка ў Украіне прайшоў другі тур выбараў прэзідэнта. Паводле канчатковых вынікаў, новым прэзідэнтам стаў Зяленскі, які набраў 73,22% галасоў. Дзеючы прэзідэнт Украіны Пятро Парашэнка атрымаў 24,45% галасоў выбарцаў.

Вярхоўная Рада прызначыла інаўгурацыю Зяленскага на 20 траўня.

Еўразвяз на цырымоніі будзе прадстаўляць віцэ-прэзідэнт Еўракамісіі Мараш Шэфчовіч, таксама прыбыць мае намер прэзідэнт Літвы Даля Грыбаўскайтэ.