Намесніка галоўнага лекара медцэнтра МТЗ прысудзілі да 7,5 гадоў

Сяргея Семіжона прызналі вінаватым у атрыманні хабару 28 тысяч даляраў.

У чацвер, 23 траўня, суд Фрунзенскага раёна Менска абвясціў прысуд Сяргею Семіжону. Яго прызналі вінаватым у атрыманні хабару 28 тысяч і прысудзілі да пазбаўлення волі. Падчас выступу з апошнім словам, намеснік галоўнага лекара медцэнтра МТЗ прызнаўся, што ўпершыню ў жыцці апынуўся ў такой цяжкай сітуацыі, і назваў гэта «бясконцым сорамам», піша tut.by.

Судовае пасяджэнне паводле чарговай «справы медыкаў» доўжылася амаль месяц. Сяргей Семіжон прызнаў віну часткова, ён не адмаўляў хабару, але намагаў: «Адзінага намеру не было». Яшчэ падчас папярэдняга расследавання намеснік галоўнага лекара медцэнтра МТЗ кампенсаваў шкоду, вярнуўшы 28 тысяч даляраў, якія атрымаў у якасці хабару.

- Я хачу сказаць, што глыбока раскайваюся ў зробленым. Прашу прабачэння ў сваіх калегаў, сям'і, добрых людзей, што прымусіў вас пакутаваць. Гэта бясконцы сорам, які ўпершыню адчуваю за свае 56 гадоў жыцця, - казаў падчас апошняга слова Сяргей Семіжон.

Пракурор Жанна Баранава прасіла суд прызнаць лекара вінаватым і прысудзіць да 7,5 года пазбаўлення волі ў калоніі ўзмоцненага рэжыму з канфіскацыяй маёмасці. Суд пайшоў у дарадчы пакой і сёння абвясціў прысуд. Семіжон прызнаны вінаватым на падставе ч.3 арт.430 (Атрыманне хабару ў асабліва значнай суме) і прыгавораны да 7,5 года пазбаўлення волі.

Падчас выступу ў судзе ў якасці сведак былыя падначаленыя Семіжона распавядалі, што за ім заробак стаў вышэйшым, цэнтр пачаў закупляць сучаснае абсталяванне, а пасля ягонага затрымання супрацоўнікі сталі звальняцца.

Прысуд не ўвайшоў у законнае дзеянне і можа быць абскарджаны.

Нагадаем, гэта ўжо не першы прысуд паводле «справы медыкаў». Былога галоўнага лекара Рэспубліканскага цэнтра медыцынскай рэабілітацыі і бальнеалячэння Сяргея Карыцьку за атрыманне хабару 2 тысячы даляраў прысудзілі да 2,5 гадоў «хатняй хіміі». Па прыгаворы суда экс-кіраўнік РНПЦ траўматалогіі і артапедыі Аляксандр Бялецкі атрымаў 7,5 гады пазбаўлення волі. Намеснік міністра аховы здароўя Ігар Ласіцкі - 6 гадоў пазбаўлення волі ў калоніі ва ўмовах ўзмоцненага рэжыму з канфіскацыяй маёмасці, галоўны лекар 12-й стаматалагічнай паліклінікі Уладзімір Краўчонак - пяць гадоў. Былы кіраўнік Гарадзенскага абласнога аддзела аховы здароўя Андрэй Стрыжак асуджаны на 7,5 гады пазбаўлення волі ў калоніі ўзмоцненага рэжыму з канфіскацыяй маёмасці. А галоўнага лекара Менскай абласной лякарні Андрэя Каралько прысудзілі да 4 гадоў. Такі ж тэрмін атрымаў і былы галоўны лекар 1-й гарадской клінічнай лякарні Алег Фамін.