Навальны знайшоў дарагую нерухомасць у міністра культуры РФ і масажыста Пуціна
13- 23.05.2019, 15:18
- 26,253
Апублікаванае расследаванне аб пентхаўсе ў Маскве і вілах у Харватыі.
«Эхо Москвы» апублікавала новае расследаванне Аляксея Навальнага:
Ці ведаеце вы, што чэрап чалавека, які быў пры жыцці блізкім да Бога, цямнее пасля смерці і пахне. А часам і міраструменіць. Чарапы ж звычайных людзей застаюцца звычайнымі, белымі.
Спрачаюся, што не ведаеце. А таму што няпраўда гэта ўсё. Правільна Уладзімір Салаўёў сказаў.
А я ведаю, таму што паглядзеў фільм «Інакенцій Сібіракоў. Дапамажыце мне, я страшна багаты!»
Глядзець мне яго давялося на простую прычыну. Міністр Культуры РФ Уладзімір Мядзінскі і стваральнік кінашэдэўраў Канстанцін Галашчапаў (a.k.a. «масажыст Пуціна») за нашы з вамі грошы прасоўваюць гэты кінашэдэўр. Аплачваюць яго паказы не толькі ў Расеі, але і ў Францыі і Швайцарыі.
І сённяшняе маё відэа носіць гранічна прыкладны характар. Там, можа, і не такія вялікія грошы, але ўсё ж я патрабую, каб прасоўванне за дзяржаўны кошт было спыненае. Хай аплачваюць самі Мядзінскі і Галашчапаў.
Я гляджу сюды і бачу што?
Новенькі двухпавярховы пентхаўс міністра культуры Расеі Мядзінскага. Набыты і аформлены на жонку.
Такая прыгажосць у самым цэнтры Масквы каштуе не менш за 200 мільёнаў рублёў. Сцвярджаю, што няма больш у свеце міністра культуры з нерухомасцю такой раскошы і такім коштам.
Сцвярджаю таксама, што сям'я Мядзінскага ні ў якім разе не мае дастатковых легальных даходаў, каб такі пентхаўс набыць. Ён проста крадзе грошы, мяркую, што ў тым ліку і на кіно, і траціць на раскошнае жыццё.
Надта праваслаўны? Наперад - замольвай грахі. Аплачвай паказы фільма пра праваслаўнага мецэната сам.
Другі дзядзечка. Канстанцін Галашчапаў. «Масажыст Пуціна».
Быў масажыстам у тым самым клубе дзюдо, адкуль уся зладзейская банда: Ротэнбергі і г.д. Цяпер, як і пакладзена, дзядзечка стаў мільярдэрам на блізкасці да дзяржаўных падрадаў.
Віла ў Харватыі за 40 мільёнаў.
Суперэлітныя апартаменты ў Маскве. Увесь пяты паверх гэтага дома.
Грамадзянства той жа самай Харватыі (не праваслаўнай, між іншым, краіны).
Зняў фільм - твая справа. Але прасоўваць гэты фільм за дзяржбюджэт - прабачце.
Вы, грамадзянін Галашчапаў, багаты - самі аплачвайце сваю прагу да сінематографа.
Далей не пішу, у расследаванні ўсё ўбачыце, там цікава.
Прашу дапамогі з распаўсюдам. Вельмі хочацца, каб больш народа ўбачыла, гэта павышае імавернасць скасавання нахабнай дзяржзакупкі.
Калі валодаеце нейкай інфармацыяй аб справах Мядзінскага/Галашчапава, то цалкам ананімна можаце пісаць на «Чорную Скрыню». Толькі памятайце, сувязь аднабаковая, мы не бачым, хто вы, і калі не пакінеце кантакты, звязацца не зможам.
Калі падтрымаеце тое, што мы робім, то абавязкова зазірніце сюды, ФБК працуе выключна на вашы ахвяраванні».