Белавежская пушча ўвайшла ў топ самых прыгожых паркаў Еўропы

Падборка самых уражлівых прыродных ландшафтаў Еўропы.

4 траўня адзначаецца Еўрапейскі дзень паркаў. Да гэтай даты нямецкая тэлерадыёкампанія Deutsche Welle склала падборку самых уражлівых прыродных ландшафтаў Еўропы.

Трыглаў: архідэі і эдэльвейсы

Адзіны нацыянальны парк Славеніі названы ў гонар гары Трыглаў, якая знаходзіцца на яго тэрыторыі. Гэта не проста гара - яе выява красуецца на сцягу і гербе краіны. Уважаецца, што назва Трыглаў паўстала праз тры вяршыні гары. Існуе іншая версія: згодна з легендай, рэзідэнцыя аднайменнага бажаства размясцілася на піку гэтай гары вышынёй больш за 2,8 тысячы м.

Найстарэйшы лес Еўропы

Нацыянальны парк «Белавежская пушча» размясціўся на мяжы Польшчы і Беларусі. Згодна з ЮНЕСКА, гэтая пушча - адзіны прыклад дагістарычнага лесу, які калісьці закрываў сучасную Еўропу. Сярэдні ўзрост дрэваў - амаль 90 гадоў, а некрануты ландшафт служыць домам для зуброў.

Нямецкі рамантызм

Нацыянальны парк «Саксонская Швейцарыя» размешчаны на мяжы Нямеччыны і Чэхіі. Той, хто шукае натхнення, можа прайсціся па «сцежцы мастакоў» (Malerweg) даўжынёй у 112 км, тут любілі шпацыраваць жывапісцы розных пакаленняў. А са скалістага масіва Бастай адкрываецца надзвычайны від на Эльбу.

Этна: монстар пад гарой

Магутны волат Тыфон змагаўся з Зеўсам датуль, пакуль грамабой не ўразіў яго маланкай і не накінуў на яго гару Этну. З тых часоў пераможаны Тыфон гневаецца, час ад часу выклікаючы буры і вывяржэнні. Але Этна на італьянскім востраве Сіцылія не толькі «плюецца» агнём, але яшчэ і служыць урадлівай глебай для фіялак і ядлоўца.

Плітвіцкія азёры

Каля мільёна чалавек штогод наведваюць найстарэйшы нацыянальны парк «Плітвіцкія азёры» ў Харватыі. Турыстаў прыцягваюць маляўнічыя месцы: 16 азёр, злучаных вадаспадамі, вапняковыя пячоры, букавыя і хваёвыя лясы. Тут водзяцца дзікія жывёлы: ваўкі, мядзведзі, лясныя каты, казулі.

Татры: пячоры і мядзведзі

Татранскі нацыянальны парк - ахоўная прыродная зона на мяжы Польшчы і Славакіі. У парку знаходзіцца самая высокая гара Польшчы - Рысы. Акрамя таго, тут размясцілася блізу 650 пячор, 30 горных азёр, вадаспад Велком-Сіклава вышынёй 70 м. Пераважаюць хваёвыя і бярозавыя лясы, у якіх водзяцца бурыя мядзведзі, рысі, чорныя казлы і беркуты.

Дзева возера

У парку Лох-Ламонд у Шатландыі размяшчаюцца лясы, горныя даліны і аднайменнае возера. Менавіта тут Вальтэр Скот напісаў сваю знакамітую паэму «Дзева возера», апублікаваную ў 1810 годзе. Пасля выхаду гэтай кнігі аўтар праславіўся за межамі Вялікабрытаніі.

Гран-Парадыз - радзіма альпійскіх казлоў

Да 1856 года італьянскі нацыянальны парк «Гран-Парадыз» выкарыстоўваўся як месца для спартовага палявання. Праз пагрозы знікнення альпійскіх казлоў парк быў абвешчаны запаведнікам. Акрамя рэдкіх горных казлоў, тут таксама водзяцца гарнастаі, альпійскія суркі і еўразійскія пугачы.