Чым вострасюжэтныя фільмы карысныя для мозгу

Амерыканскія навукоўцы зрабілі цікавыя высновы.

Фільмы жахаў, якія з'явіліся яшчэ ў 1890-х гадах, з тых часоў не страчваюць сваёй папулярнасці, хоць з пункту гледжання здаровага сэнсу любоў да хорару і здаецца нонсэнсам. Чаму ж многіх з нас так цягне глядзець страшнае кіно, чытаць гатычную фантастыку і наведваць пакоі з прывідамі? Навукоўцы з Пітсбургскага ўніверсітэта паспрабавалі знайсці тлумачэнне гэтай дзіўнай захопленасці і нават выявілі карысць, якую жахі прыносяць нашаму мозгу, піша «Рубежи Здоровья».

Амерыканскія даследчыкі папрасілі гасцей пакою страху да і пасля яго наведвання адказаць на шэраг пытанняў, якія тычацца свайго псіхалагічнага стану. Акрамя таго, да і пасля забавы навукоўцы даследавалі актыўнасць мозгу ўдзельнікаў эксперыменту з дапамогай электраэнцэфалаграфа, паведамляе часопіс Emotion.

Аналіз вынікаў паказаў, што ў гасцей пакоя жахаў пасля яго наведвання паляпшаўся настрой, паніжаўся ўзровень трывожнасці і стомленасці. Больш за тое, чым больш яны палохаліся - тым лепш адчувалі сябе пасля атракцыёну.

Электраэнцэфалограф паказаў, што актыўнасць мозгу пасля праходжання пакоя паменшылася. Аўтары даследавання параўналі гэты эфект з эфектам ад медытацыйных практык, якія таксама супакойваюць мозг.

Акрамя таго, сцвярджаюць навукоўцы, гледзячы фільм жахаў ці губляючыся ў лабірынтах пакоя прывідаў, мы ўсё ж разумеем, што рэальнай пагрозы нашаму жыццю няма, а таму мы ў стане зірнуць на сябе з боку і адсачыць, якія менавіта прычыны зараджалі ў нас пачуццё страху. Так што пакой жахаў - гэта яшчэ і спосаб спазнаць сябе лепш, упэўненыя экспэрты.

Аднак і гэта яшчэ не апошняя перавага хорараў. Аўтары працы сцвярджаюць, што наведванне пакоя страхаў альбо паход у кіно з сябрамі дазваляе ўмацаваць сацыяльныя сувязі. Дзякуючы сумеснаму перажыванню аднолькавых эмоцый вы становіцеся бліжэй адзін аднаму.