Зяленскі паабяцаў рэфарматарскія законапраекты для развіцця малога і сярэдняга бізнэсу
14- 15.06.2019, 20:36
- 11,663
Прэзідэнт Украіны адзначыў, што малы і сярэдні бізнэс - гэта «кроў для арганізма краіны».
Прэзідэнт Украіны Уладзімір Зяленскі паведаміў аб падрыхтоўцы законапраектаў, якія будуць спрыяць развіццю малога і сярэдняга бізнэсу.
Як перадае Цензор.НЕТ, пра гэта паведамляецца ў суботу на сайце прэзідэнта Украіны.
У паведамленні сказана, што ў час рабочай паездкі ў Марыупаль Данецкай вобласці Зяленскі наведаў мультыхаб Spalah, дзе пагутарыў з прагрэсіўнай моладдзю і прадстаўнікамі бізнэсу.
Прэзідэнт Украіны адзначыў, што малы і сярэдні бізнэс - гэта «кроў для арганізма краіны».
«Што можа зрабіць улада? Улада можа не замінаць і толькі дапамагаць», - сказаў Зяленскі.
«Галоўная мэта - «дзяржава ў смартфоне», каб мінімізаваць камунікацыю бізнэсу з чыноўнікамі», - падкрэсліў ён.
Прэзідэнт Украіны паведаміў, што цяпер рыхтуюцца рэфарматарскія законапраекты, якія спрыяюць развіццю малога і сярэдняга бізнэсу.
Кіраўнік дзяржавы таксама падкрэсліў важнасць рэформы праваахоўных органаў.
Прэзідэнт Украіны паглядзеў прэзентацыю праграмы развіцця малога і сярэдняга прадпрымальніцтва горада Марыупаль, а таксама пагутарыў са слухачамі IТ-курса Beetroot Academy.