«Палатачнік», які прапанаваў набіраць у войска 40-гадовых: Сам служыў тры месяцы
115- 27.06.2019, 13:09
- 95,938
Мікалай Расоха апавёў пра сваю пазіцыю датычна новага закона пра прызыў.
26 чэрвеня «палата прадстаўнікоў» у першым чытанні прагаласавала за новы закон аб прызыве ў войска. Законапраект прадугледжвае, што адтэрміноўку ад прызыву для прадаўжэння адукацыі ў Беларусі будуць прапаноўваць толькі адзін раз. Таксама для «ўхілістаў» зачыняць мяжу.
У ходзе абмеркавання паправак запомніўся «дэпутат» ад Мазырскай выбарчай акругі №43 Мікалай Расоха, які прапанаваў падняць планку прызыўнога ўзросту з 27 гадоў да 40.
«Наша Ніва» звярнуліся да «дэпутата», каб ён абгрунтаваў сваю пазіцыю.
– Што тут казаць? Чаму не служыць? Трэба служыць і ўсё! Гэта ж святы абавязак, які запісаны ў Канстытуцыі. Трэба выканаць свой абавязак як мае быць.
– Пагадзіцеся, што ў 35–40 гадоў здароўе ўжо зусім не тое, як у 18 ці 23.
– Вас жа ніхто не прымушае бегчы тры-пяць кіламетраў. У вас спецыяльнасць?
– Педагагічная.
– Чаму мы не можам вам даць магчымасць выкладаць у тым жа кадэцкім вучылішчы або ў сувораўскім? Вы выдатна знойдзеце сабе выкарыстанне ў сённяшняй арміі. Чаму вы мяркуеце, што гэта не служба – вучыць будучых вайскоўцаў? А сувязіст хіба не служыць? А кухар хіба не служыць? Усе служаць. У сорак гадоў мужык кулаком сцяну павінен яшчэ праламаць і не заўважыць гэтага.
– Вы асабіста былі б гатовыя пайсці жыць у казарму ў свае сорак гадоў?
– А чаму не, чаму не? Не трэба так гаварыць, гатовы ці не гатовы. Трэба сабе сказаць: «Ёсць». Па-вайсковаму – і ўсё.
– Вы самі служылі?
– Я скончыў ВНУ з вайсковай кафедрай і пайшоў на зборы на тры месяцы ў Берасце.
– З дзедаўшчынай не сутыкаліся?
– Не. У нас былі адэкватныя хлопцы, якія мелі вышэйшую адукацыю. Нармальна служылі, без усялякіх праблемаў. Інтэлект усё ж быў крыху вышэйшы. Мы проста ведалі, што гэта трэба – і ўсё. Успомніце наш час, калі чалавек атрымліваў так званы «белы білет». Хлопцы глядзелі на такога чалавека коса. Закон ёсць закон, і яго трэба выконваць.
– Той факт, што ў інтэрнэце настолькі хутка сабралі 10 тысячаў подпісаў супраць гэтых паправак, Вас не прымусіў задумацца?
– Я не ведаю, я не магу каментаваць. У нас ёсць чалавек, які вядзе гэты законапраект, я толькі задаў пытанне, якое мяне цікавіла. Асноўны закон у нас які? Канстытуцыя. Давайце яго выконваць.
– Вы супраць прафесійнага войска?
– Хто вам сказаў? Не, нічога не супраць. Усё добра, усё нармальна: і прафесійнае, і такое войска. Не трэба казаць, што супраць. Чытаем Канстытуцыю і выконваем яе, там чорным па белым усё напісана.