У Гомелі верніка запісалі ў «дармаеды»

Мікалай Пяшко праз рэлігійныя погляды адмовіўся працаваць па найму.

Паводле версіі адміністрацыі Чыгуначнага раёна Гомеля дармаедам выявіўся працаздольны, не заняты ў эканоміцы жыхар абласнога цэнтра 45-гадовы Мікалай Пяшко. Аб сваім статусе мужчына даведаўся выпадкова з атрыманага рахунку за паслугі ЖКГ, дзе яму налічылі ў 5,5 разоў больш, чым звычайна за падагрэў гарачай вады, паведамляе «Гомельская весна».

Самотны мужчына, ва ўласнасці якога знаходзіцца аднапакаёвая кватэра, з выстаўленай сумай не згодны і ўжо шукае абароны ў мясцовым аддзяленні незалежнага прафзвязу РЭП.

«Я з'яўляюся крышнаітам, у мяне ёсць вера і духоўны настаўнік, што забараняе мне працаваць па найму. Усё жыццё перабіваюся дробнымі заробкамі, надаю бытавыя паслугі сябрам і знаёмым. Мой лад жыцця цалкам адпавядаў беларускаму заканадаўству, пакуль не з'явіўся сумнавядомы дэкрэт №3», - тлумачыць свой статус Мікалай Пяшко.

Пасля атрымання пацяжэлага ў разы рахунку гамяльчук з дапамогай прафзвязу РЭП звярнуўся з прэтэнзіяй у арганізацыю, якая налічвае аплату за паслугі ЖКГ. Выявілася, што спісы працаздольных грамадзян, не занятых у эканоміцы, фармуюцца і зацвярджаюцца мясцовымі адміністрацыямі. Далей гэтыя спісы накіроўваюцца ў арганізацыі, якія налічваюць аплату за камунальныя паслугі.

«На вашу асабовым рахунку за красавік 2019 аплата за гарачае водазабеспячэнне была налічаная паводле тарыфу, які забяспечвае поўную кампенсацыю эканамічна абгрунтаваных выдаткаў. Замест субсідаванага тарыфу 16,92 руб за 1 Гкал, вам выстаўлены да аплаты тарыф у суме 88,99 руб за 1 Гкал», - паведаміў у адрас новаспечанага дармаеда намеснік дырэктара разлікова-даведачнага цэнтра Гомеля А.Чуяшоў.

Прававы інспектар прафзвязу РЭП Леанід Судаленка пракаментаваў сённяшнюю сітуацыю, якая склалася ў прававыкарыстальнай практыцы дармаедскага дэкрэта №3:

- Прафзвяз РЭП уважаў і па-ранейшаму ўважае, для таго, што б удзельнічаць у эканоміцы, дастаткова з'яўляцца спажыўцом тавараў і паслуг, у тым ліку і падакцызных, аплатнікам дзяржаўных збораў і падаткаў. Іншымі словамі, па-за залежнасцю ад сваёй занятасці, Мікалай Пяшко ўважаецца за занятага ў эканоміцы, бо выплачвае ўскосныя падаткі пры куплі тавараў і паслуг, пры карыстанні мабільнай сувяззю.

Прафсаюзны юрыст зазначыў, што ў існых умовах ажыццяўлення беларускага правасуддзя суды не прымаюць да разгляду так званыя дармаедскія скаргі, фактычна адмаўляючы грамадзянам у правасуддзі. Аднак, ён рэкамендуе кожнаму, каго ўлада назвала дармаедам, бараніць свае правы, як гэта робіць вядомая хатняя гаспадыня з Гомеля Марыя Тарасенка.

6 чэрвеня Мікалай Пяшко разам з прафсаюзным юрыстам накіравалі ў тэрытарыяльную дармаедскую камісію заяву аб выключэнні яго са спісу асоб, не занятых у эканоміцы. У выпадку, калі чыноўнікі не прыслухаюцца да голасу розуму, вернік будзе ставіць пытанне пра пераслед з боку дзяржавы праз ягоныя перакананні, а таксама парушэнне ягонай свабоды сумлення і веравызнання.