19 лiстапада 2019, aўторак, 9:19
Дзень другі
Рубрыкі

Іёсуб: На курсе рубля неўзабаве можа адбіцца гісторыя з «дрэннай» нафтай

3
Іёсуб: На курсе рубля неўзабаве можа адбіцца гісторыя з «дрэннай» нафтай
ВАДЗІМ ІЁСУБ
ФОТА: ONLINER.BY

Ужо відавочна, што прадпрыемствы нафтаперапрацоўкі недаатрымалі прыбытку.

Нашай валюце ёсць чаго баяцца. Што чакаць рублю ў агляднай будучыні?

Пра гэта ў экспрэс-каментары «Салідарнасці» распавёў старэйшы аналітык «Альпары» Вадзім Іёсуб.

- Напраўду, калі на рынку нешта таннее або даражэе, прычына заўсёды адна: суадносіны попыту і прапановы. Калі мы гаворым аб валютным рынку, то апошнія месяцы там пераважае прапанова чыстай валюты, то бок, прадаюць валюты больш, чым купляюць. Гэта калі казаць пра сукупныя дзеянні і насельніцтва, і прадпрыемстваў, - тлумачыць экспэрт. - У выніку мы назіраем умацаванне беларускага рубля да валютнага кошыка агулам і часта, як, напрыклад, апошнія дні, гэта выяўляецца ў тым, што могуць таннець адразу тры замежныя валюты: і даляр, і еўра, і расейскі рубель.

Як доўга гэта будзе прадаўжацца, сказаць складана. На думку Вадзіма Іёсуба, у агляднай будучыні насельніцтва, як і раней, застанецца чыстым прадаўцом валюты, а вось прадпрыемствы могуць пачаць валюту купляць.

- Калі яны стануць на чыстай аснове купляць больш, чым прадае насельніцтва, курс замежнай валюты пачне расці, - тлумачыць экспэрт.

Ёсць і яшчэ адзін фактар, які можа паўплываць на падзенне курсу беларускага рубля.

- Я думаю, неўзабаве могуць адбіцца наступствы гісторыі з дрэннай нафтай, - адзначае Вадзім Іёсуб. - Ужо відавочна, што прадпрыемствы нафтаперапрацоўкі недаатрымалі прыбытку. Рэальна на рынку гэта адбіваецца пазней. І, магчыма, вось гэтую гісторыю з дрэннай нафтай рынак на сабе яшчэ адчуе. У кожным выпадку рана ці позна беларускі рубель пачне таннець.

Сёння, калі ў Беларусі не фіксаваны, а плыўны курс, валюты могуць як расці, так і падаць, і гэта адбываецца досыць непрадказальна.

- Таму называць нейкія даты, што курс разгорнецца праз месяц ці праз два, гэта безнадзейны занятак. Гэтага не ведае загадзя ні Лукашэнка, ні кіраўнік Нацбанку. Усё залежацьме ад таго, як будзе складвацца сітуацыя ў эканоміцы, як будуць мяняцца кошты нафты на вонкавых рынках, ад таго, якія ў нас будуць перспектывы ў перамовах з Расеяй у крэдытах, ці ўдасца нам узяць альтэрнатыўны крэдыт у Кітаі і многіх іншых фактараў, - тлумачыць Вадзім Іёсуб.