ЗША вылучаць $ 42 мільёны апазіцыі ў Венесуэле

Сродкі перададуць камандзе Хуана Гуайдо.

Злучаныя Штаты перанакіруюць больш за 40 мільёнаў даляраў, зыходна асігнаваных на гуманітарную дапамогу Цэнтральнай Амерыцы, на падтрымку апазіцыі ў Венесуэле. Службовы дакумент, у якім Агенцтва міжнароднага развіцця апавяшчае пра гэты крок Кангрэс, апынуўся ў газеты The Los Angeles Times, паведамляе «Голас Амерыкі».

Названыя 40 мільёнаў будуць перададзеныя камандзе лідара апазіцыі Хуана Гуайдо. Яны пойдуць на аплату супрацоўнікаў апазіцыйнага штаба, іх раз'езды, арганізацыю семінараў пра практыкі дэмакратычнага кіравання і тэхналогіі правядзення выбарчых кампаній, ажыццяўленне агітацыйных мерапрыемстваў і «іншыя ініцыятывы ў галіне дэмакратычнага будаўніцтва».

Амерыканскі прэзідэнт Дональд Трамп і ягоны памочнік у нацыянальнай бяспецы Джон Болтан называюць афіцыйны ўрад у Каракасе «былым рэжымам Мадуры». ЗША, а таксама большасць краінаў Еўропы і Лацінскай Амерыкі, прызналі Гуайдо законным часовым прэзідэнтам Венесуэлы. Вашынгтон сёння ўжо і так выдаткоўвае буйныя сумы на размяшчэнне венесуэльскіх бежанцаў у суседніх краінах, забеспячэнне іх прадметамі першай неабходнасці; у консульствах Венесуэлы на тэрыторыі ЗША адбываецца замена дыпламатаў, прызначаных Мадурам, на людзей, лаяльных Гуайдо.

Атрымальнікамі 42 мільёнаў даляраў павінны былі стаць Гватэмала і Гандурас – дзве з трох краінаў Цэнтральнай Амерыкі, на якія прыпадае асноўная маса незаконных імігрантаў, якія спрабуюць трапіць у Злучаныя Штаты. Галоўнымі прычынамі іх уцёкаў называюцца крайняя галеча і разгул гвалту.

Усяго на гуманітарную дапамогу Цэнтральнай Амерыцы Вашынгтон вылучыў летась 370 мільёнаў даляраў. Дональд Трамп пагражаў заблакаваць перадачу гэтых сродкаў бенефіцыярам, калі мясцовыя ўлады не пакладуць канец нелегальнай масавай міграцыі.