У Маскве чацвёрты дзень запар праходзіць акцыя апазіцыі
- 18.07.2019, 20:32
- 7,888
Незалежныя кандыдаты ў дэпутаты Масгардумы зноў сабраліся на Трубнай плошчы.
У чацвер у Маскве незалежныя кандыдаты ў дэпутаты Масгардумы, якіх не зарэгістраваў Масгарвыбаркам, зноў сабраліся на Трубнай плошчы на акцыю пратэсту супраць нядопуску іх да выбараў. Разам з імі на плошчу выйшлі некалькі сотняў чалавек.
Адзін з апазіцыйных кандыдатаў, Іван Жданаў, заявіў, што ў сераду паліцыя ўручыла яму папярэджанне аб недапушчальнасці акцый на Трубнай плошчы. Са слоў Жданава, перасцярогу ён парваў.
Таксама палітык, вядомы сваёй працай ў Фондзе барацьбы з карупцыяй Аляксей Навальны, заклікаў масквічоў выйсці 20 ліпеня на праспект акадэміка Сахарава на ўзгоднены мітынг у падтрымку незалежных кандыдатаў.
На плошчы таксама гучаць заклікі адправіць у адстаўку кіраўніка Масгарвыбаркама Валянціна Гарбунова.
Радыё Свабода вядзе трансляцыю акцыі:
Раней апазіцыянеры Ілля Яшын, Любоў Собаль, Іван Жданаў, Канстанцін Янкаўскас, Юлія Галяміна ды іншыя, каго выбарчая камісія зняла з выбараў у Масгардуму, заклікалі масквічоў выходзіць кожны дзень а сёмай гадзіне вечара на Трубную плошчу і патрабаваць рэгістрацыі незалежных кандыдатаў.
Палітыкі заявілі пра фальсіфікацыі з мэтай не дапусціць іх да ўдзелу ў галасаванні. З іх слоў, сябры выбарчых камісій адмыслова рабілі памылкі пры ўнясенні звестак выбарцаў у электронную сістэму, каб потым на гэтай падставе прызнаць несапраўднымі іх подпісы.
У некаторых выпадках кандыдатам абвяшчалі, што людзей, якія паставілі за іх подпіс, не існуе. Сярод такіх апынуўся заснавальнік суполкі «Диссернет» Андрэй Заякін і прафесар Маскоўскай вышэйшай школы сацыяльных і эканамічных навук Рыгор Юдзін, якія ставілі подпісы за кандыдатку Алену Русакова, а таксама прафесарка Вышэйшай школы эканомікі Алена Лук'янава і тэлевядоўца Міхаіл Шырвіндт, якія падпісваліся за вылучэнне Любові Собаль.
Выбары ў Маскоўскую гарадскую думу пройдуць у адзіны дзень галасавання 8 верасня. Для ўдзелу ў іх кандыдатам не ад парламенцкіх партый трэба было сабраць некалькі тысяч подпісаў выбарцаў, зарэгістраваных у адпаведных акругах.