Сем самых нечаканых вынікаў выбараў ва ўкраінскую Раду

Датэрміновыя парламенцкія выбары прынеслі Украіне нямала нечаканых вынікаў.

«Новое время» сабрала самыя важныя вынікі выбараў, якія не былі відавочна прагназаванымі.

1. Монабольшасць «Слугі народа»

Упершыню ў гісторыі Украіны партыя-пераможца выбараў зможа сфармаваць аднапартыйную большасць.

Абсалютны фаварыт выбарчых сімпатый - «Слуга народа» - паводле папярэдніх звестак, можа разлічваць на 253 уласныя дэпутаты ў Радзе.

Набраўшы 43,17% галасоў у сваю падтрымку, прапрэзідэнцкая палітсіла праводзіць у парламент 124 нардэпаў. Яшчэ 129 вылучэнцаў партыі Уладзіміра Зяленскага перамагаюць у мажарытарных акругах - гэта стала галоўным сюрпрызам выбараў.

Такога поспеху не чакалі, відавочна, нават у самой партыі.

2. Абнаўленне складу парламента - максімальнае за 20 гадоў

Запыт на «новыя асобы» ў Радзе дзявятага склікання будзе рэалізаваны цалкам. У Лабараторыі заканадаўчых ініцыятыў падлічылі, што 80,4% новых народных абраннікаў атрымаюць мандаты ўпершыню.

Гэта рэкорднае абнаўленне для ўкраінскага парламента за апошнія два дзясяткі гадоў - пачынаючы з выбараў 1998 года. Яшчэ больш істотным абнаўленне было толькі ў 1996 годзе, калі ў Раду другога склікання прайшлі 86% «новых асоб».

3. Дзясяткі вядомых топ-палітыкаў - за бортам Рады

Пасля галасавання ў парламент не трапляе цэлы шэраг вядомых палітыкаў, якія цягам многіх гадоў (а некаторыя - і двух апошніх дзесяцігоддзяў) працавалі ў Радзе і фармавалі мэйнстрым украінскай палітыкі.

У новым парламенце не будзе ні Алега Ляшко, ні шмат каго з экс-«рэгіяналаў», якія выявіліся ў правальным спісе Апаблока, ні самых уплывовых людзей з атачэння Пятра Парашэнкі.

4. У парламент прайшла рэкордная колькасць жанчын

У Радзе дзявятага склікання, паводле папярэдніх выніках падліку галасоў, будзе 86 жанчын-дэпутатаў. Гэта блізу 20% - гэта значыць, кожнае пятае крэсла зойме народная выбранніца.

Для незалежнай Украіны гэта рэкорд. У парламенце папярэдняга склікання жанчын было 53 (12,5%), а ў Вярхоўнай Радзе I склікання - усяго 3,5%.

5. Рэкордна нізкі прыход

Цяперашнія датэрміновыя выбары прыпалі на сезон летніх адпачынкаў, і многія экспэрты прагназавалі невысокі прыход.

Аднак актыўнасць выбаршчыкаў выявілася не проста нізкай, а рэкордна нізкай: да выбарчых участкаў дайшлі менш за палову ўкраінцаў, унесеных у спісы (49,8%). Гэта найгоршы паказчык парламенцкіх выбараў у гісторыі незалежнай Украіны. А рэкордна высокі прыход быў зафіксаваны ў 1994 годзе, калі выбіраць новых дэпутатаў прыйшлі 75,6% выбаршчыкаў.

6. Партыя Шарыя атрымала падтрымку ў разы большую за дасведчаных палітыкаў

Адыёзны прарасейскі блогер Анатоль Шарый не змог узяць удзел у выбарах. ЦВК пры падтрымцы Вярхоўнага суда адмовіла прапагандысту ў рэгістрацыі, бо ён не пражываў ва Украіне апошнія пяць гадоў.

Аднак вынік Партыі Шарыя выявіўся галоўным сюрпрызам сярод сіл, якія не прайшлі ў Раду. Палітсіла фінішавала дзясятай і набрала 2,23%. Пры гэтым новаствораная Партыя Шарыя пакінула ззаду значна больш дасведчаныя палітычныя рухі. Сярод іх - аб'яднаны спіс нацыяналістаў (ВА «Свабода» - 2,16%), Грамадзянская пазіцыя экс-міністра абароны Анатоля Грыцэнкі (1,05%), «Самопомич» львоўскага мэра Андрэя Садовага (0,62%) і Рух новых сіл Міхеіла Саакашвілі (0,46%).

Цяпер Партыя Шарыя будзе атрымліваць фінансаванне з дзяржбюджэту - блізу 12 млн грн на год. Згодна з украінскім заканадаўствам, на бюджэтныя сродкі можа разлічваць кожная партыя, якая набрала на выбарах больш за 2% галасоў - нават калі ў Раду яна не праходзіць.

7. У многіх мажарытарных акругах у барацьбе перамаглі кандыдаты-сенсацыі

Барацьба за дэпутацкае крэсла ў мажарытарных акругах прынесла мандаты самым нечаканым кандыдатам.

Нямала такіх прыкладаў ужо сталі прадметам абмеркавання апошніх дзён. Сярод іх - 77-я акруга ў Запарожскай вобласці: тут былы рэгіянал- «цяжкавагавік» Вячаслаў Багуслаеў, шматгадовы гендырэктар «Матор Січы» і дэпутат чатырох скліканняў саступіў 29-гадоваму вясельнаму фатографу Сяргею Штэпу ад «Слугі народа».

У 197-й акрузе ў Каневе (Чаркаская вобласць) перамог тэлевядоўца Аляксандр Скічко. Вылучэнец «Слугі народа» пазбавіў мандата дэпутата Уладзіслава Голуба, выбранага ад БПП.

А 29-гадовы Раман Грышчук, стваральнік і кіраўнік камедыйнага шоў «Мамахахатала», выбіў з гонкі шматгадовага паплечніка Парашэнкі і Юшчанкі Дзмітрыя Андрыеўскага. Грышчук перамог дэпутата ў 222-й акрузе Кіева.