Складзены партрэт сярэднестатыстычнага беларускага аўтамабіліста

На чым ездзіць, колькі марнуе і як абслугоўваецца.

Ведаеце анекдот пра сярэднюю тэмпературу ў лякарні 36,6 градусаў? Менавіта таму ствараць партрэт сярэднестатыстычнага беларуса таксама не вельмі ўдзячная справа, піша сайт abw.by.

Што можа быць агульнага ў чалавека з аўтамабілем за 100 тысяч даляраў і за тысячу, акрамя сіняга пашпарта з гербам? З іншага боку, нейкі «стандартны» партрэт спажыўца можа многае расказаць пра краіну. Журналісты б з радасцю скарысталіся афіцыйнай статыстыкай, але, на жаль, у ДАІ расстарацца інфармацыю па аўтапарку беларусаў вельмі складана. А паводле некаторых важных пазіцый нават дзяржаўны ўлік не дапаможа.

Таму цягам не аднаго месяца журналісты задавалі чытачам у сацсетках розныя пытанні, выніковыя звесткі аб якіх у выніку склаліся ў адну карціну.

На якіх аўто ездзяць беларусы? Колькі яны марнуюць на паліва? Колькі машын не праходзіць тэхагляд? Колькі аўтамабіляў у беларускіх сем'ях? Цяпер усё раскажам і пакажам.

Адкуль машыны

Нягледзячы на тое, што мытныя падаткі на аўто значна выраслі ва ўжо дастаткова далёкім 2011-м, большасць беларусаў па-ранейшаму ездзіць на аўтамабілях, якія прывезлі з Еўропы і ЗША да ліпеня 2011 года. Паводле звестак нашага апытання, такіх аўтамабіляў крыху больш за 56%.

Для параўнання: толькі 11% машын размытненыя паводле адзінай стаўкі Мытнага саюза.

Якія маторы

Пад капотам у машынах беларусаў часцей за ўсё рухавік аб'ёмам 1,9-2,0 літра. Гэты варыянт абралі 29% удзельнікаў апытання. На другім месцы ў папулярнасці маторы аб'ёмам ад 1,6 да 1,8 літра. Малалітражкі з рухавікамі да 1,2 складаюць крыху больш за адзін адсотак. Характэрна, што аўто з маторамі 3,5 літра і вышэй амаль у пяць разоў больш.

Грошы і аўтамабіль

У месяц на паліва ў большасці апытаных сыходзіць прыблізна 100-150 рублёў - так адказалі 22%. 19% рэспандэнтаў на паліва марнуюць 150-200 рублёў.

Штогод на рамонт і абслугоўванне аўтамабіля беларусы аддаюць прыблізна 300-500 даляраў. На другім месцы з розніцай у сотыя долі адсотка размясціўся варыянт 200-300 даляраў.

Колькі ездзяць

Пры гэтым чвэрць апытаных за год намотвае ад 10.000 да 15.000 км. Яшчэ 17% ездзіць 15.000-20.000 на год. Блізу 10% рэспандэнтаў праязджае 20.000-25.000 км. У больш чым 18% беларусаў штогадовы прабег перавышае 30.000.

Як часта мяняюць ГЗМ і дзе купляюць

Аліву ў рухавіку большасць мяняе кожныя 10.000 км, калі дакладней - амаль 54% апытаных. 31% робіць гэта часцей, раз у 7000-8000 прабегу. Блізу 10% мяняе аліву кожныя 12.000-15.000 км. Вялікія міжсервісныя інтэрвалы - гэта не пра нас.

Аліву часцей за ўсё набываюць у крамах 52% апытаных. Амаль 16% заказваюць іх у інтэрнэт-крамах. Выбіраюць для гэтага рынкі і АЗС па 9% рэспандэнтаў.

Камфорт

Кандыцыянер спраўна працуе ў кожным другім аўто. У 30% машын кандыцыянер ёсць, але не функцыянуе. У 20% аўтамабіляў яго проста няма.

Тэхагляд? Не, не чуў

Яшчэ нашы суграмадзяне не вельмі любяць плаціць «падатак на паветра» і разам з тым праходзіць тэхагляд. У 55% аўтамабіляў чытачоў тэхагляд не пройдзены.

Дарэчы, больш за 7% апытаных прызналіся, што прайсці ТА сумленна досыць складана, ім даводзіцца «выкручвацца».

Стаўленне да парадаў

І калі ва ўсіх апытаннях самы папулярны варыянт толькі раз набірае больш за 60%, то ў адным з іх адсотак зашкальвае: 87% рэспандэнтаў мяркуюць, што Беларусі не патрэбныя вайсковыя парады. На іх думку, гэта лішняе марнаванне грошай.

Такім чынам, агулам мы з вамі - гэта кіроўцы «ўзроставага» двухлітровага еўрапейца, якія праязджаюць за дзень блізу 30 км, добрасумленна абслугоўваюць свой аўтамабіль і пазбягаюць тэхагляду і парадаў.