Расейцы нечакана зацікавіліся жыллём у Грузіі

Колькасць грамадзян РФ, якія плануюць купіць кватэру ў Грузіі, вырасла амаль у пяць разоў.

Сярод расейцаў значна павялічыўся попыт на нерухомасць у Турцыі і Грузіі, піша finanz.ru. Па выніках першай паловы 2019 года колькасць грамадзян РФ, якія плануюць купіць кватэру ў Турцыі, вырасла што да аналагічнага перыяду мінулага года амаль утрая, у Грузіі - амаль у пяць разоў.

Турцыя стала другім пасля Гішпаніі паводле папулярнасці замежным кірункам, годам раней яна знаходзілася на чацвёртай пазіцыі. У турэцкім Інстытуце статыстыкі пацвярджаюць той факт, што нерухомасць у краіне ўсё больш вабіць замежнікаў - з яго звестак, у траўні ў траўні 2019 года ў краіне было прададзена 82,3 тысячы аб'ектаў нерухомасці, у параўнанні з аналагічным перыядам 2018 года паказчык вырас на 31, 3%. Найбольш актыўна купляюць турэцкую нерухомасць выхадцы з Ірака і Ірана, следам ідуць грамадзяне Расеі, Афганістана і Савудаўскай Арабіі.

Адным з чыннікаў высокага попыту на турэцкую нерухомасць стала зніжэнне курсу ліры, кажа аналітык Prian.ru Анастасія Фалей. За першае паўгоддзе валюта патаннела ў дачыненні да даляра на 8%. Акрамя таго, у Турцыі купля нерухомасці дае права атрымання дазволу на жыхарства, адзначае экспэртка.

Са звестак Tranio.ru, цікавасцю у пакупнікоў карыстаюцца перш за ўсё кватэры ў коштавым дыяпазоне € 80-100 тысяч. У Еўропе за такія грошы добрую нерухомасць знайсці немагчыма, а ў Турцыі - цалкам рэальна, тлумачыць кіраўніца турэцкага кірунку Tranio.ru Марыя Жарая.

Заснавальнік партала Indriksons.ru Ігар Індрыксанс называе ўкладанне грошай у турэцкую нерухомасць рызыкоўным, паказваючы на тое, што дзеянні ўладаў краіны непрадказальныя, у нейкі момант замежнікам могуць у адзін дзень забараніць валодаць жыллём. Ён звязвае вялікія дысконты з масавай міграцыяй з краіны. Колькасць ахвотных пакінуць Турцыю пасля няўдалай спробы вайсковага перавароту расце з 2016 года з-за пачуцця небяспекі, палітычнага ціску і браку свабоды.

Грузія ў рэйтынгу папулярнасці ў расейцаў паднялася з 23-га на 15-е месца. Для гэтага ёсць перадумовы, паказваюць у Prian.ru. Так, законы краіны дазваляюць замежнікам купляць нерухомасць, прапорцыі кошту і якасці здаюцца прывабным. Да таго ж, акрамя курортнага жылля ў краіне актыўна прапануецца інвестыцыйнае: мясцовыя кіраўнікі заяўляюць аб прыбытковасці да 20-25%, дадае Фалей.