Лондан вылучае мільёны на падтрымку СМІ ва Усходняй Еўропе

МЗС Вялікабрытаніі выдзеліць 18 млн фунтаў стэрлінгаў на барацьбу з распаўсюджваннем фэйкавых навін.

Вялікабрытанія выдзеліць 18 млн фунтаў стэрлінгаў (блізу 20 млн еўраў) на барацьбу з распаўсюджваннем дэзінфармацыі і фэйкавых навін ва Усходняй Еўропе, а таксама ўмацаванне незалежных СМІ ў дзяржавах Заходніх Балкан. Пра гэта заявіў кіраўнік МЗС Вялікабрытаніі Джэрэмі Хант у нядзелю, 7 ліпеня. Гэтыя сродкі будуць пералічаныя на працягу трох гадоў у Фонд прадухілення канфліктаў, садзейнічання стабільнасці і бяспекі (Conflict, Stability and Security Fund, CSSF), дадаў дыпламат, паведамляе Немецкая волна.

Усяго ж на падтрымку незалежных СМІ ва Усходняй Еўропе і Цэнтральнай Азіі плануецца вылучыць 100 млн фунтаў стэрлінгаў на працягу пяці гадоў, адзначаецца ў паведамленні МЗС Вялікабрытаніі.

Хант назваў Вялікабрытанію «сусветным лідарам у выяўленні дэзінфармацыі»

Спасылаючыся на звесткі няўрадавай арганізацыі Freedom House, Хант адзначыў, што толькі дзесяць адсоткаў насельніцтва ў свеце сёння маюць доступ да свабодных СМІ. «У той жа час дэзінфармацыя і «фэйк ньюз» падрываюць стабільнасць грамадства ў шэрагу краін», - дадаў дыпламат. «Уклад, пра які мы паведамілі сёння, будзе выкарыстоўвацца для падтрымкі журналістаў, якія працуюць у краінах, дзе найбольш распаўсюджаныя рэпрэсіі», - падкрэсліў Хант.

Са слоў палітыка, пасля атручвання ў Солсберы былога двайнога агента Сяргея Скрыпаля і яго дачкі Юліі пры дапамозе нервова-паралітычнага рэчывы тыпу «Навічок» Вялікабрытанія «стала сусветным лідарам у галіне раскрыцця дэзінфармацыі». Нядаўна ўлады краіны запусцілі спецыяльную трэніровачную праграму для сябраў урада і прадстаўнікоў грамадскасці ў распазнанні ілжывай інфармацыі ў СМІ і працы з ёй.