18 жнiўня 2019, Нядзеля, 2:57
Мы ў адной лодцы
Рубрыкі

Як прадпрыемства-банкрут, што «не працавала і дня» шле прывітанне «Камволю»

30
Як прадпрыемства-банкрут, што «не працавала і дня» шле прывітанне «Камволю»

Цэментныя заводы і іншыя ахвяры непрадуманых дзеянняў уладаў.

Вы яшчэ не забыліся пра амбітныя планы ўладаў вырабіць і прадаць 6 мільёнаў пагонных метраў тканін? Гаворка ідзе пра «Камволь», у які дзяржава ўклала больш за 100 мільёнаў даляраў, піша «Салiдарнасць».

У адным з інтэрв'ю кіраўніца канцэрна «Беллегпрам» Таццяна Лугіна, калі гаворка зайшла пра гэтыя планы, задалася пытаннем:

- Вырабіць мы, напэўна, зможам. Пытанне разумення, куды мы будзем рэалізоўваць. Зразумела, што нас ніводны рынак так проста не пусціць. Нішы занятыя, як і ў любым іншым асартыменце.

Але складанасць пастаўленай задачы не збянтэжыла чыноўніцу і далей у інтэрв'ю яна пачала разважаць пра варыянты яе выканання.

Пра тое, чым можа скончыцца паслядоўнасць «спачатку пабудуем/мадэрнізуем прадпрыемства - выпусцім прадукцыю - а там і паглядзім, куды яе будзем прадаваць», мы бачылі ўжо не раз.

Самы свежы прыклад - дзяржпрадпрыемства «Бярозатара», якое знаходзіцца ў стадыі ліквідацыі. На яго базе быў рэалізаваны ўхвалены кіраўніком дзяржавы праект стварэння ўпакоўкі для вадкіх харчовых прадуктаў тыпу «тэтрапак».

Але праз тое, што прадпрыемства пачало працу да з'яўлення ў краіне ўласнай сыравіны, упакоўка якую яно выпускала, аказалася нікому не патрэбнай.

У выніку ўзніклі праблемы з вяртаннем крэдытных рэсурсаў, спробы знайсці новага інвестара ні да чаго не прывялі.

- Гэта новае прадпрыемства, якое не прапрацавала ніводнага дня. Заява ў суд пра яго эканамічную неплацежаздольнасць (банкруцтва) была пададзеная ўласнікам - Мінсельгасхарчам. Мы спрабавалі яго саніраваць, але, на жаль, беспаспяхова, - словы старшыні Эканамічнага суда Берасцейскай вобласці Сяргея Кулака гучаць як прысуд не толькі бярозаўскаму заводу.

Але і іншыя праекты дзяржавы, запушчаныя без папярэдніх разлікаў і дакладнага разумення, каму ў выніку прадаваць гатовую прадукцыю. Так ужо было ў цэментнай галіне. А на падыходзе ў нас запуск уласнай АЭС.