WSJ: Злучаныя Штаты Амерыкі і ўлады Венесуэлы вядуць сакрэтныя перамовы

У краіне могуць прайсці датэрміновыя выбары.

Адміністрацыя Дональда Трампа ўступіла ў перамовы з людзьмі з найбліжэйшага атачэння непрызнанага Злучанымі Штатамі і дзясяткамі іншых краін дыктатара Венесуэлы Нікаласа Мадуры. Мэта перамоў - стварэнне ўмоў для сыходу Мадуры з пасады і правядзенне свабодных выбараў у краіне, якая знаходзіцца ў глыбокай эканамічнай дэпрэсіі. Пра гэта ў сераду ўвечары паведаміла газета The Wall Street Journal са спасылкай на ўдзельнікаў перамоў з боку Венесуэлы, паведамляе "Радыё Свабода".

Паведамляецца, што ў перамовы з адміністрацыяй Трампа уцягнуты Дыёсдада Кабельё, кіраўнік канстытуцыйнай асамблеі краіны, у мінулым кіраўнік парламента Венесуэлы. Ён стаў аб'ектам амерыканскіх санкцый паводле падазрэння ў датычнасці да кантрабанды наркотыкаў.

Цікавасць Кабельё ды іншых удзельнікаў перамоў з боку Венесуэлы ў атрыманні амерыканскіх і міжнародных гарантый таго, што яны змогуць заставацца ў краіне і не баяцца за сваю бяспеку. Гэтыя гарантыі павінна паважаць урад, які прыйдзе да ўлады ў Венесуэле ў выніку мірнага працэсу.

Упершыню аб кантактах амерыканскай адміністрацыі з атачэннем Мадуры стала вядома ў аўторак. Пра гэта заявіў сам Дональд Трамп. Крыху пазней інфармацыю пацвердзіў і Нікалас Мадура.

Як піша The Wall Street Journal, перамовы з Кабельё - прызнанне адміністрацыяй Трампа беспаспяховасці намаганняў прымусіць Нікаласа Мадуру сысці ў адстаўку, таму яна спрабуе прыцягнуць да гэтага працэсу іншыя цэнтры ўлады ў Венесуэле.